ਚੰਡੀਗੜ੍ਹ : ਕੈਨੇਡਾ ਵਿੱਚ ਫੈਸ਼ਨ ਰਨਵੇਅ ‘ਤੇ ਬੜੇ ਮਾਣ ਨਾਲ ਦਸਤਾਰ ਸਜਾ ਕੇ ਤੁਰਨ ਵਾਲੀ ਭਾਰਤ ਤੋਂ ਪੰਜਾਬੀ ਮੂਲ ਦੀ ਇੱਕ ਸਿੱਖ ਮਹਿਲਾ ਆਨਲਾਈਨ ਸਭ ਦਾ ਦਿਲ ਜਿੱਤ ਰਹੀ ਹੈ। ਮਾਡਲ ਨਵਜੋਤ ਕੌਰ ਟੋਰਾਂਟੋ ਵਿੱਚ ਇੱਕ ਫੈਸ਼ਨ ਸ਼ੋਅ ਦੌਰਾਨ ਸ਼ਾਨਦਾਰ ਪੇਸ਼ਕਾਰੀ ਦੇਣ ਤੋਂ ਬਾਅਦ ਇੰਟਰਨੈੱਟ ‘ਤੇ ਛਾਈ ਹੋਈ ਹੈ, ਜਿੱਥੇ ਉਸ ਨੇ ਪੂਰੇ ਆਤਮ-ਵਿਸ਼ਵਾਸ ਅਤੇ ਸ਼ਾਨੋ-ਸ਼ੌਕਤ ਨਾਲ ਆਪਣੀ ਸਿੱਖ ਪਛਾਣ ਨੂੰ ਪੇਸ਼ ਕੀਤਾ। ਹੋਰਨਾਂ ਮਾਡਲਾਂ ਦੇ ਨਾਲ ਸਿਰ ਉੱਚਾ ਕਰਕੇ ਖੜ੍ਹੀ ਨਵਜੋਤ ਨੇ ਬੜੇ ਮਾਣ ਨਾਲ ਦਸਤਾਰ ਸਜਾਈ ਹੋਈ ਸੀ, ਜਿਸ ਰਾਹੀਂ ਉਸ ਨੇ ਆਪਣੀ ਪਛਾਣ, ਇਤਿਹਾਸ ਅਤੇ ਵਿਸ਼ਵਾਸ ਦਾ ਸੁਨੇਹਾ ਦਿੱਤਾ। ਉਸ ਦੀ ਇਸ ਦਿੱਖ ਨੇ ਸੋਸ਼ਲ ਮੀਡੀਆ ਵਰਤੋਂਕਾਰਾਂ ਦੇ ਦਿਲਾਂ ਨੂੰ ਛੂਹ ਲਿਆ ਹੈ ਅਤੇ ਕਈ ਲੋਕ ਉਸ ਦੇ ਆਤਮ-ਵਿਸ਼ਵਾਸ ਅਤੇ ਕੌਮਾਂਤਰੀ ਫੈਸ਼ਨ ਮੰਚ ‘ਤੇ ਆਪਣੀਆਂ ਸਿੱਖ ਜੜ੍ਹਾਂ ਦੀ ਨੁਮਾਇੰਦਗੀ ਕਰਨ ਦੇ ਤਰੀਕੇ ਦੀ ਸ਼ਲਾਘਾ ਕਰ ਰਹੇ ਹਨ। ਆਪਣੇ ਇੰਸਟਾਗ੍ਰਾਮ ਅਕਾਊਂਟ (@kaur_navjotkhalsa) ‘ਤੇ ਫੈਸ਼ਨ ਸ਼ੋਅ ਦੀਆਂ ਤਸਵੀਰਾਂ ਸਾਂਝੀਆਂ ਕਰਦਿਆਂ ਨਵਜੋਤ ਨੇ ਇਸ ਪਲ ਨੂੰ ਇੱਕ ਲੰਮੇ ਸਫ਼ਰ ਦੀ ਸ਼ੁਰੂਆਤ ਦੱਸਿਆ। ਉਸ ਨੇ ਲਿਖਿਆ, “ਅਜੇ ਲੰਮਾ ਪੈਂਡਾ ਤੈਅ ਕਰਨਾ ਹੈ, ਇਹ ਤਾਂ ਸਿਰਫ਼ ਸ਼ੁਰੂਆਤ ਹੈ! ਕਦੇ ਕਲਪਨਾ ਨਹੀਂ ਕੀਤੀ ਸੀ ਪਰ ਯਕੀਨਨ ਹਾਸਲ ਕਰ ਲਿਆ ਹੈ। ਤੁਸੀਂ ਆਪਣੀ ਪਛਾਣ, ਇਤਿਹਾਸ ਅਤੇ ਵਿਸ਼ਵਾਸ ਨੂੰ ਨਾਲ ਲੈ ਕੇ ਦੁਨੀਆ ਦੇ ਹਰ ਮੰਚ ‘ਤੇ ਮਜ਼ਬੂਤੀ ਨਾਲ ਖੜ੍ਹੇ ਹੋ ਸਕਦੇ ਹੋ। ਬੱਸ ਆਪਣੇ ਅੰਦਰ ਵੱਸਦੀ ਉਸ ਪਰਮ ਸ਼ਕਤੀ ‘ਤੇ ਵਿਸ਼ਵਾਸ ਰੱਖੋ! ਹਾਂ, ਮੈਂ ਆਪਣਾ ਸਰਵੋਤਮ ਪ੍ਰਦਰਸ਼ਨ ਕੀਤਾ ਹੈ ਅਤੇ ਆਉਣ ਵਾਲੇ ਸਾਲਾਂ ਵਿੱਚ ਵੀ ਅਜਿਹਾ ਹੀ ਕਰਦੀ ਰਹਾਂਗੀ! ਮੌਕਾ ਦੇਣ ਵਾਲੇ ਡਿਜ਼ਾਈਨਰਾਂ ਨੂੰ ਬਹੁਤ ਸਾਰਾ ਪਿਆਰ।”
Posted inChandigarh
ਸਿੱਖੀ ਸਰੂਪ ‘ਚ ਰੈਂਪ ਵਾਕ ਕਰਕੇ ਛਾਈ ਨਵਜੋਤ ਕੌਰ; ਕੈਨੇਡਾ ਦੇ ਫੈਸ਼ਨ ਸ਼ੋਅ ’ਚ ਦਸਤਾਰ ਸਜਾ ਕੇ ਵਧਾਇਆ ਮਾਣ

