ਲੁਧਿਆਣਾ : ਕੈਨੇਡਾ ਵਿੱਚ ਪੰਜ ਸਾਲ ਬਿਤਾਉਣ ਤੋਂ ਬਾਅਦ ਆਪਣੇ ਵਤਨ ਪੰਜਾਬ ਪਰਤੇ ਪਿੰਡ ਸਰਾਭਾ ਦੇ ਗੈਰੀ ਸਿੰਘ ਨੇ ਸ਼ੁਰੂਆਤ ਵਿੱਚ ਟੈਕਸੀ ਚਲਾਉਣ ਦਾ ਕਾਰੋਬਾਰ ਸ਼ੁਰੂ ਕੀਤਾ ਸੀ। ਹਾਲਾਂਕਿ, ਟੈਕਸੀ ਦਾ ਕਾਰੋਬਾਰ ਉਸ ਦੀਆਂ ਉਮੀਦਾਂ ਅਨੁਸਾਰ ਸਫ਼ਲ ਨਹੀਂ ਹੋ ਸਕਿਆ। ਪਰ ਹਾਰ ਮੰਨਣ ਦੀ ਬਜਾਏ, ਗੈਰੀ ਨੇ ਆਪਣੇ ਪੁਰਾਣੇ ਸ਼ੌਕ ਵੱਲ ਰੁਖ਼ ਕੀਤਾ ਅਤੇ ਤਾਜ਼ੇ ਫਲਾਂ ਦੀ ‘ਫਰੂਟ ਕਰੀਮ’ ਤਿਆਰ ਕਰਕੇ ਵੇਚਣੀ ਸ਼ੁਰੂ ਕਰ ਦਿੱਤੀ। ਅੱਜ ਉਸ ਦੀ ਛੋਟੀ ਜਿਹੀ ਰੇਹੜੀ ਨੌਜਵਾਨਾਂ ਅਤੇ ਪਰਿਵਾਰਾਂ ਵਿੱਚ ਬੇਹੱਦ ਮਕਬੂਲ ਹੋ ਚੁੱਕੀ ਹੈ, ਜਿੱਥੇ ਡਰੈਗਨ ਫਰੂਟ ਅਤੇ ਕੀਵੀ ਵਰਗੇ ਖਾਸ ਫਲਾਂ ਨਾਲ ਤਿਆਰ ਫਰੂਟ ਕਰੀਮ ਦਾ ਸੁਆਦ ਲਓਣ ਲਈ ਲੋਕਾਂ ਦੀਆਂ ਲਾਈਨਾਂ ਲੱਗਦੀਆਂ ਹਨ।
ਦੋ ਸਾਲ ਪਹਿਲਾ ਭਾਰਤ ਪਰਤਿਆ ਗੈਰੀ
ਕਰੀਬ ਦੋ ਸਾਲ ਪਹਿਲਾਂ ਭਾਰਤ ਪਰਤੇ ਗੈਰੀ ਸਿੰਘ ਨੇ ਦੱਸਿਆ ਕਿ ਉਹ ਅਤੇ ਉਸ ਦੀ ਪਤਨੀ ਕੈਨੇਡਾ ਵਿੱਚ ਮਹੀਨੇ ਦੇ ਕਰੀਬ 5,000 ਡਾਲਰ (ਲੱਖਾਂ ਰੁਪਏ) ਕਮਾ ਰਹੇ ਸਨ, ਪਰ ਉਸ ਦਾ ਸੁਪਨਾ ਪੰਜਾਬ ਆ ਕੇ ਆਪਣਾ ਕੋਈ ਕੰਮ ਸਥਾਪਤ ਕਰਨ ਦਾ ਸੀ। ਉਸ ਨੇ ਕਿਹਾ, “ਵਾਪਸ ਆ ਕੇ ਮੈਂ ਟੈਕਸੀ ਦਾ ਕੰਮ ਸ਼ੁਰੂ ਕੀਤਾ ਜੋ ਚੱਲ ਨਹੀਂ ਸਕਿਆ, ਪਰ ਮੈਂ ਇਸ ਨੂੰ ਅਸਫ਼ਲਤਾ ਨਹੀਂ ਮੰਨਿਆ। ਮੈਂ ਕੁੱਝ ਵੱਖਰਾ ਕਰਨ ਦੀ ਸੋਚੀ ਅਤੇ ਫਰੂਟ ਕਰੀਮ ਦੀ ਰੇਹੜੀ ਲਗਾਉਣੀ ਸ਼ੁਰੂ ਕਰ ਦਿੱਤੀ।” ਛੋਟੇ ਪੱਧਰ ’ਤੇ ਸ਼ੁਰੂ ਹੋਇਆ ਇਹ ਕੰਮ ਮਹਿਜ਼ ਤਿੰਨ ਮਹੀਨਿਆਂ ਦੇ ਅੰਦਰ ਹੀ ਇੰਨਾ ਚੱਲ ਪਿਆ ਕਿ ਉਸ ਦੀ ਕਮਾਈ ਭਾਰਤ ਵਿੱਚ ਇੱਕ ਚੰਗੀ ਨੌਕਰੀ ਦੇ ਬਰਾਬਰ ਹੋ ਗਈ। ਗੈਰੀ ਰੋਜ਼ਾਨਾ ਸ਼ਾਮ 4 ਵਜੇ ਤੋਂ ਰਾਤ 10 ਵਜੇ ਤੱਕ ਆਪਣੀ ਰੇਹੜੀ ਲਗਾਉਂਦਾ ਹੈ। ਉਸ ਦੇ ਇਸ ਕਾਰੋਬਾਰ ਨੂੰ ਸੋਸ਼ਲ ਮੀਡੀਆ ’ਤੇ ਵੀ ਭਰਵਾਂ ਹੁੰਗਾਰਾ ਮਿਲਿਆ ਹੈ, ਜਿੱਥੇ ਉਸ ਦੇ ਇੰਸਟਾਗ੍ਰਾਮ ਅਕਾਊਂਟ ’ਤੇ 15,000 ਤੋਂ ਵੱਧ ਫਾਲੋਅਰਜ਼ ਹੋ ਚੁੱਕੇ ਹਨ। ਉਸ ਵੱਲੋਂ ਫਰੂਟ ਕਰੀਮ ਬਣਾਉਣ ਅਤੇ ਆਪਣੇ ਸਫ਼ਰ ਦੀਆਂ ਪੋਸਟ ਕੀਤੀਆਂ ਵੀਡੀਓਜ਼ ਨੇ ਵੱਡੀ ਗਿਣਤੀ ਲੋਕਾਂ ਨੂੰ ਉਸ ਦੀ ਰੇਹੜੀ ਤੱਕ ਪਹੁੰਚਾਇਆ ਹੈ। ਖਰੀਦਦਾਰਾਂ ਦੇ ਉਤਸ਼ਾਹ ਨੂੰ ਦੇਖਦਿਆਂ ਗੈਰੀ ਹੁਣ ਆਪਣੇ ਕਾਰੋਬਾਰ ਦਾ ਵਿਸਥਾਰ ਕਰ ਰਿਹਾ ਹੈ ਅਤੇ ਉਸ ਨੇ Menu ਵਿੱਚ ‘ਛੱਟੀ ਦੀ ਲੱਸੀ’ ਵੀ ਸ਼ਾਮਲ ਕੀਤੀ ਹੈ।ਆਪਣੇ ਇਸ ਸਫ਼ਰ ਤੋਂ ਸਬਕ ਲੈਂਦਿਆਂ ਗੈਰੀ ਨੇ ਪੰਜਾਬ ਦੇ ਨੌਜਵਾਨਾਂ ਨੂੰ ਸੁਨੇਹਾ ਦਿੱਤਾ ਕਿ ਛੋਟੇ ਕੰਮਾਂ ਨੂੰ ਕਦੇ ਨਫ਼ਰਤ ਨਾਲ ਨਹੀਂ ਦੇਖਣਾ ਚਾਹੀਦਾ। ਉਸ ਨੇ ਕਿਹਾ, “ਪੰਜਾਬੀਆਂ ਨੂੰ ਰੇਹੜੀ ਤੋਂ ਜਾਂ ਛੋਟੇ ਪੱਧਰ ’ਤੇ ਕੰਮ ਸ਼ੁਰੂ ਕਰਨ ਤੋਂ ਝਿਜਕਣਾ ਨਹੀਂ ਚਾਹੀਦਾ, ਕਿਉਂਕਿ ਹੱਕ-ਹਲਾਲ ਦੀ ਕਮਾਈ ’ਚ ਕੋਈ ਸ਼ਰਮ ਨਹੀਂ ਹੁੰਦੀ। ਪੰਜਾਬ ਬਹੁਤ ਦਰਿਆਦਿਲ ਹੈ ਅਤੇ ਇੱਥੋਂ ਦੇ ਲੋਕ ਮਿਹਨਤੀ ਬੰਦੇ ਦਾ ਹਮੇਸ਼ਾ ਸਾਥ ਦਿੰਦੇ ਹਨ।” ਉਸ ਦਾ ਮੰਨਣਾ ਹੈ ਕਿ ਵੱਡੇ ਮੌਕੇ ਦੀ ਉਡੀਕ ਕਰਨ ਨਾਲੋਂ ਜੋ ਸਰਮਾਇਆ ਤੁਹਾਡੇ ਕੋਲ ਹੈ, ਉਸੇ ਨਾਲ ਛੋਟੀ ਸ਼ੁਰੂਆਤ ਕਰ ਲੈਣੀ ਚਾਹੀਦੀ ਹੈ।
