ਚੰਡੀਗੜ੍ਹ : ਪੰਜਾਬ ਵਿੱਚ ਪਿਛਲੇ 4.5 ਸਾਲਾਂ ਦੌਰਾਨ ਔਸਤਨ ਹਰ ਮਹੀਨੇ 60 ਗੈਂਗਸਟਰ ਜਾਂ ਰੋਜ਼ਾਨਾ ਦੋ ਗੈਂਗਸਟਰ ਫੜੇ ਗਏ ਹਨ। ਗੈਂਗਸਟਰਾਂ ਬਾਰੇ ਉਪਲੱਬਧ ਪੁਲੀਸ ਅੰਕੜਿਆਂ ਅਨੁਸਾਰ, ਸੂਬੇ ਵਿੱਚ 6 ਅਪਰੈਲ 2022 ਨੂੰ ਐਂਟੀ-ਗੈਂਗਸਟਰ ਟਾਸਕ ਫੋਰਸ (AGTF) ਦੇ ਗਠਨ ਤੋਂ ਲੈ ਕੇ 10 ਨਵੰਬਰ ਤੱਕ 3,339 ਗੈਂਗਸਟਰਾਂ ਅਤੇ ਅਪਰਾਧੀਆਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ, ਜੋ ਕਿ ਰੋਜ਼ਾਨਾ ਲਗਪਗ ਦੋ ਬਣਦੇ ਹਨ। ਡੀਜੀਪੀ ਗੌਰਵ ਯਾਦਵ ਨੇ ‘ਦਿ ਟ੍ਰਿਬਿਊਨ’ ਨੂੰ ਦੱਸਿਆ, “ਅਸੀਂ 6 ਅਪਰੈਲ 2022 ਤੋਂ ਹੁਣ ਤੱਕ 3,339 ਗੈਂਗਸਟਰਾਂ ਅਤੇ ਅਪਰਾਧੀਆਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ, 41 ਨੂੰ ਢੇਰ (Neutralised) ਕੀਤਾ ਹੈ ਅਤੇ 1,293 ਅਪਰਾਧਿਕ ਮੋਡੀਊਲਾਂ ਦਾ ਪਰਦਾਫਾਸ਼ ਕੀਤਾ ਹੈ।” ਡੀਜੀਪੀ ਯਾਦਵ ਨੇ ਕਿਹਾ, “ਸੁਰੱਖਿਆ ਏਜੰਸੀਆਂ ਦੀ ਮਦਦ ਨਾਲ ਇਹ ਪੰਜਾਬ ਪੁਲੀਸ ਦਾ ਇੱਕ ਕੇਂਦਰਿਤ ਅਪਰੇਸ਼ਨ ਰਿਹਾ ਹੈ। ਇਹਨਾਂ ਗੈਂਗਸਟਰਾਂ ਦੀ ਪਾਕਿਸਤਾਨ ਦੀ ਆਈਐੱਸਆਈ (ISI) ਅਤੇ ਕੈਨੇਡਾ ਤੇ ਹੋਰ ਵਿਦੇਸ਼ੀ ਮੁਲਕਾਂ ਵਿੱਚ ਬੈਠੇ ਭਾਰਤ-ਵਿਰੋਧੀ ਗਰੋਹਾਂ ਵੱਲੋਂ ਸਰਗਰਮੀ ਨਾਲ ਮਦਦ ਕੀਤੀ ਜਾ ਰਹੀ ਹੈ। ਇਹਨਾਂ ਦੀ ਨਿਸ਼ਾਨਦੇਹੀ ਕਰਨਾ ਅਤੇ ਇਹਨਾਂ ਦੀਆਂ ਗਤੀਵਿਧੀਆਂ ਨੂੰ ਰੋਕਣਾ ਇੱਕ ਵੱਡਾ ਕਾਰਜ ਹੈ, ਜਿਸ ਲਈ ਪੁਲੀਸ ਕੇਂਦਰੀ ਏਜੰਸੀਆਂ ਦੀ ਸਰਗਰਮ ਮਦਦ ਲੈ ਰਹੀ ਹੈ।”
ਪੁਲੀਸ ਨੇ ਅਪਰਾਧ ਵਿੱਚ ਵਰਤੇ ਗਏ 2,525 ਹਥਿਆਰ ਅਤੇ 755 ਵਾਹਨ ਵੀ ਬਰਾਮਦ ਕੀਤੇ ਹਨ। ਏਜੀਟੀਐੱਫ (AGTF) ਦਾ ਆਪਣਾ ਹਿੱਸਾ 503 ਗ੍ਰਿਫ਼ਤਾਰੀਆਂ, 10 ਨੂੰ ਢੇਰ ਕਰਨਾ, 196 ਮੋਡੀਊਲ ਭੰਗ ਕਰਨਾ, 421 ਹਥਿਆਰ ਅਤੇ 121 ਵਾਹਨ ਹਨ। ਬਾਕੀ ਕਾਰਵਾਈ ਫੀਲਡ ਯੂਨਿਟਾਂ ਵੱਲੋਂ ਕੀਤੀ ਗਈ ਹੈ, ਜਿਸ ਵਿੱਚ 2,836 ਗ੍ਰਿਫ਼ਤਾਰੀਆਂ, 31 ਨੂੰ ਢੇਰ ਕਰਨਾ, 1,097 ਮੋਡੀਊਲ ਭੰਗ ਕਰਨਾ, 2,104 ਹਥਿਆਰ ਅਤੇ 634 ਵਾਹਨ ਸ਼ਾਮਲ ਹਨ।
ਡੀਜੀਪੀ ਨੇ ਦੱਸਿਆ ਕਿ ਹਾਲ ਹੀ ਦੇ ਸਾਲਾਂ ਵਿੱਚ ਵਿਦੇਸ਼ਾਂ ਵਿੱਚ ਬੈਠੇ 17 ਗੈਂਗਸਟਰਾਂ ਨੂੰ ਡਿਪੋਰਟ (ਦੇਸ਼ ਨਿਕਾਲਾ) ਜਾਂ ਪ੍ਰਤਿਅਰਪਣ (Extradited) ਕਰਕੇ ਭਾਰਤ ਲਿਆਂਦਾ ਗਿਆ ਹੈ। ਇਹਨਾਂ ਵਿੱਚ ਯੂਏਈ (UAE) ਤੋਂ ਵਿੱਕੀ ਬਰਾੜ, ਅਮਰੀਕਾ (USA) ਤੋਂ ਅਨਮੋਲ ਬਿਸ਼ਨੋਈ, ਅਜ਼ਰਬਾਈਜਾਨ ਤੋਂ ਸਚਿਨ ਥਾਪਨ ਉਰਫ਼ ਸਚਿਨ ਬਿਸ਼ਨੋਈ, ਇੰਡੋਨੇਸ਼ੀਆ ਤੋਂ ਜੋਬਨ ਬਿੱਲਾ ਅਤੇ ਮਲੇਸ਼ੀਆ ਤੋਂ ਜੱਸਾ ਬਹਿਬਲ ਸ਼ਾਮਲ ਹਨ। ਦੋ ਹੋਰਾਂ ਨੂੰ ਕੈਨੇਡਾ ਤੋਂ ਅਤੇ ਬਾਕੀਆਂ ਨੂੰ ਫਿਲੀਪੀਨਜ਼, ਹਾਂਗਕਾਂਗ, ਅਰਮੀਨੀਆ, ਮੋਲਦੋਵਾ ਅਤੇ ਮੱਧ ਏਸ਼ੀਆ ਤੋਂ ਵਾਪਸ ਲਿਆਂਦਾ ਗਿਆ। ਈਥੋਪੀਆ ਤੋਂ ਵਾਪਸ ਲਿਆਂਦਾ ਗਿਆ ਗੁਰਵਿੰਦਰ ਸਿੰਘ ਉਰਫ਼ ਅਫ਼ਰੀਦੀ ਸਭ ਤੋਂ ਨਵਾਂ ਅਤੇ ਅਫ਼ਰੀਕਾ ਤੋਂ ਪਹਿਲਾ ਮਾਮਲਾ ਹੈ। ਮੋਲਦੋਵਾ ਤੋਂ ਅੰਮ੍ਰਿਤ ਦਿਲਮ ਦੀ ਵਾਪਸੀ ਯੂਰਪ ਤੋਂ ਪਹਿਲੀ ਵਾਪਸੀ ਸੀ।
ਪੁਲੀਸ ਨੇ NCB-ਇੰਡੀਆ ਰਾਹੀਂ ਹੁਣ ਤੱਕ 49 ਰੈੱਡ ਕਾਰਨਰ ਨੋਟਿਸ ਜਾਰੀ ਕਰਵਾਏ ਹਨ। ਹੋਰ 13 ਬਿਊਰੋ ਕੋਲ ਪੈਂਡਿੰਗ ਹਨ ਅਤੇ 72 ਪ੍ਰਕਿਰਿਆ ਅਧੀਨ ਹਨ। 9 ਬਲੂ ਕਾਰਨਰ ਨੋਟਿਸ ਜਾਰੀ ਕੀਤੇ ਗਏ ਹਨ, ਇੱਕ ਪੈਂਡਿੰਗ ਹੈ ਅਤੇ 10 ਪ੍ਰਕਿਰਿਆ ਅਧੀਨ ਹਨ।
ਇਨਾਮੀ ਸੂਚੀ: ਕੌਣ ਰਹਿੰਦਾ ਹੈ ਰਡਾਰ ’ਤੇ
ਪੰਜਾਬ ਪੁਲੀਸ ਨੇ 28 ਲੋੜੀਂਦੇ ਅਪਰਾਧੀਆਂ ਦੀ ਪਹਿਲੀ ਸੂਚੀ ਨੋਟੀਫਾਈ ਕੀਤੀ ਹੈ। 9 ਉੱਤੇ 10 ਲੱਖ ਰੁਪਏ ਅਤੇ 19 ’ਤੇ 5 ਲੱਖ ਰੁਪਏ ਦਾ ਇਨਾਮ ਹੈ। 28 ਵਿੱਚੋਂ 6 ਨੂੰ ਹੁਣ ਤੱਕ ਕਾਬੂ ਕੀਤਾ ਜਾ ਚੁੱਕਾ ਹੈ। ਇਹਨਾਂ ਵਿੱਚ ਜੋਬਨ ਬਿੱਲਾ, ਆਦਿਤਿਆ ਕਪੂਰ ਉਰਫ਼ ਮੱਖਣ, ਸ਼ਕਤੀ ਕੁਮਾਰ, ਜਸਕਰਨ ਸਿੰਘ ਉਰਫ਼ ਕੱਟਾ, ਰਾਜਿੰਦਰ ਸਿੰਘ ਉਰਫ਼ ਬਿੱਲਾ ਅਤੇ ਅਫ਼ਰੀਦੀ ਸ਼ਾਮਲ ਹਨ।
ਪੁਲੀਸ ਦੇ ਰਡਾਰ ’ਤੇ ਅਜੇ ਵੀ ਸਭ ਤੋਂ ਪ੍ਰਮੁੱਖ ਨਾਮ 10 ਲੱਖ ਰੁਪਏ ਦੀ ਸ਼੍ਰੇਣੀ ਵਾਲੇ ਹਨ। ਇਹਨਾਂ ਵਿੱਚ ਗੋਲਡੀ ਬਰਾੜ, ਲਖਬੀਰ ਸਿੰਘ ਉਰਫ਼ ਲੰਡਾ ਹਰੀਕੇ, ਹਰਵਿੰਦਰ ਸਿੰਘ ਉਰਫ਼ ਰਿੰਦਾ, ਸਤਬੀਰ ਸਿੰਘ ਉਰਫ਼ ਸੱਤਾ ਨੌਸ਼ਹਿਰਾ, ਬਲਵਿੰਦਰ ਸਿੰਘ ਉਰਫ਼ ਡੋਨੀ ਬਲ, ਪ੍ਰਭਦੀਪ ਸਿੰਘ ਉਰਫ਼ ਪ੍ਰਭ ਦਾਸੂਵਾਲ, ਗੌਰਵ ਪਟਿਆਲ ਉਰਫ਼ ਲੱਕੀ ਪਟਿਆਲ, ਸਰਵਣ ਸਿੰਘ ਉਰਫ਼ ਜੀਵਨ ਫ਼ੌਜੀ ਅਤੇ ਰੋਹਿਤ ਗੋਦਾਰਾ ਸ਼ਾਮਲ ਹਨ।
ਡੀਜੀਪੀ ਨੇ ਦੱਸਿਆ ਕਿ ਸੂਬੇ ਵਿੱਚ 9 ਮੁੱਖ ਗਰੋਹ ਸਰਗਰਮ ਹਨ, ਜਿਨ੍ਹਾਂ ਵਿੱਚੋਂ ਜ਼ਿਆਦਾਤਰ ਵਿਦੇਸ਼ਾਂ ਵਿੱਚ ਬੈਠੇ ਲੀਡਰਾਂ ਵੱਲੋਂ ਚਲਾਏ ਜਾ ਰਹੇ ਹਨ। ਇਹਨਾਂ ਵਿੱਚ ਬੰਬੀਹਾ ਅਤੇ ਗੋਪੀ ਘਨਸ਼ਾਮਪੁਰੀਆ ਗਿਰੋਹ, ਜੱਗੂ ਭਗਵਾਨਪੁਰੀਆ ਅਤੇ ਹੈਰੀ ਚੱਠਾ ਗਿਰੋਹ, ਰਿੰਦਾ ਗਿਰੋਹ, ਲਾਰੈਂਸ ਬਿਸ਼ਨੋਈ ਅਤੇ ਆਰਜ਼ੂ ਬਿਸ਼ਨੋਈ ਗਰੋਹ, ਅਤੇ ਗੋਲਡੀ ਬਰਾੜ ਤੇ ਰੋਹਿਤ ਗੋਦਾਰਾ ਗਿਰੋਹ ਸ਼ਾਮਲ ਹਨ।
AGTF ਦੀ ਵਟਸਐਪ ਹੈਲਪਲਾਈਨ 93946-93946 ’ਤੇ 1,028 ਸ਼ਿਕਾਇਤਾਂ ਮਿਲੀਆਂ ਹਨ, ਜਿਨ੍ਹਾਂ ਵਿੱਚੋਂ 823 (80 ਫ਼ੀਸਦੀ) ਦਾ ਨਿਪਟਾਰਾ ਕੀਤਾ ਜਾ ਚੁੱਕਾ ਹੈ ਅਤੇ 205 ਪੈਂਡਿੰਗ ਹਨ। ਪੁਲੀਸ ਨੇ ਸ਼ਿਕਾਇਤਾਂ ’ਤੇ 97 ਐੱਫਆਈਆਰ (FIRs) ਦਰਜ ਕੀਤੀਆਂ ਹਨ ਅਤੇ 12 ਗ੍ਰਿਫ਼ਤਾਰੀਆਂ ਕੀਤੀਆਂ ਹਨ।
ਉਨ੍ਹਾਂ ਨੇ 24 ਲੋਕਾਂ ਨੂੰ ਰੋਕੂ ਹਿਰਾਸਤ (Preventive Detention) ਵਿੱਚ ਲਿਆ ਹੈ ਅਤੇ 119 ਲੋਕਾਂ ’ਤੇ ਨਜ਼ਰ ਰੱਖੀ ਹੈ। ਪੁਲੀਸ ਨੇ ਦੱਸਿਆ ਕਿ ਸੂਚਨਾ ਦੇਣ ਵਾਲੇ ਦੀ ਪਛਾਣ ਗੁਪਤ ਰੱਖੀ ਜਾਂਦੀ ਹੈ ਅਤੇ ਜੇਕਰ ਸੂਚਨਾ ਨਾਲ ਕਿਸੇ ਲੋੜੀਂਦੇ ਅਪਰਾਧੀ ਦੀ ਗ੍ਰਿਫ਼ਤਾਰੀ ਹੁੰਦੀ ਹੈ ਤਾਂ ਨਕਦ ਇਨਾਮ ਦਿੱਤਾ ਜਾਂਦਾ ਹੈ।
