ਮੇਸਨ (ਅਮਰੀਕਾ) : ਕੋਕੋ ਗੌਫ ਨੇ ਆਪਣਾ ਦੂਜਾ ਮਹਿਲਾ ਸਿਨਸਿਨਾਟੀ ਟੈਨਿਸ ਓਪਨ ਖਿਤਾਬ ਜਿੱਤਣ ਲਈ ਸਾਥੀ ਅਮਰੀਕੀ ਜੈਸਿਕਾ ਪੇਗੁਲਾ ਨੂੰ 6-2, 6-4 ਨਾਲ ਹਰਾ ਦਿੱਤਾ। ਫਰਾਂਸ ਦੇ ਆਰਥਰ ਫਿਲਜ਼ ਨੇ ਆਪਣੇ ਪਹਿਲੇ ਮਾਸਟਰਜ਼ 1000 ਖਿਤਾਬ ਲਈ ਪੁਰਸ਼ਾਂ ਦੇ ਫਾਈਨਲ ਵਿੱਚ ਅਮਰੀਕੀ ਫਰਾਂਸਿਸ ਟਿਆਫੋ ਨੂੰ 6-3, 1-6, 6-0 ਨਾਲ ਹਰਾਇਆ। ਸ਼ਨਿਚਰਵਾਰ ਦੇ ਸੈਮੀ ਫਾਈਨਲ ਵਿੱਚ, ਪੇਗੁਲਾ ਨੇ ਡਿਫੈਂਡਿੰਗ ਚੈਂਪੀਅਨ ਇਗਾ ਸਵਿਆਤੇਕ ਨੂੰ ਹਰਾਇਆ ਅਤੇ ਗੌਫ ਨੇ ਸਾਰਾ ਬੈਜਲੈਕ ਨੂੰ ਹਰਾ ਕੇ 56 ਸਾਲਾਂ ਵਿੱਚ ਸਿਨਸਿਨਾਟੀ ਓਪਨ ’ਚ ਪਹਿਲੇ ਆਲ-ਅਮਰੀਕੀ ਮਹਿਲਾ ਫਾਈਨਲ ਦੀ ਪੁਸ਼ਟੀ ਕੀਤੀ। ਆਖਰੀ ਵਾਰ ਦੋ ਅਮਰੀਕੀ ਮਹਿਲਾਵਾਂ ਨੇ 1970 ਵਿੱਚ ਸਿਨਸਿਨਾਟੀ ਦਾ ਫਾਈਨਲ ਖੇਡਿਆ ਸੀ, ਜਦੋਂ ਰੋਜ਼ੀ ਕੈਸਲਜ਼ ਨੇ ਨੈਂਸੀ ਰਿਚੀ ਨੂੰ ਹਰਾਇਆ ਸੀ। ਸਿਨਸਿਨਾਟੀ ਵਿੱਚ ਪੇਗੁਲਾ ਦਾ ਸਭ ਤੋਂ ਵਧੀਆ ਪ੍ਰਦਰਸ਼ਨ 2024 ਵਿੱਚ ਰਿਹਾ ਸੀ, ਜਦੋਂ ਉਹ ਫਾਈਨਲ ਵਿੱਚ ਐਰੀਨਾ ਸਬਾਲੈਂਕਾ ਤੋਂ ਹਾਰ ਗਈ ਸੀ। ਉੱਧਰ, ਫਿਲਜ਼ ਅਤੇ ਟਿਆਫੋ ਦਾ ਇਹ ਮੁਕਾਬਲਾ ਪਹਿਲਾ ਮੌਕਾ ਸੀ ਜਦੋਂ ਦੋ ਸਿਆਹਫਾਮ ਖਿਡਾਰੀ ਕਿਸੇ ਏ ਟੀ ਪੀ ਮਾਸਟਰਜ਼ 1000 ਦੇ ਫਾਈਨਲ ਵਿੱਚ ਆਹਮੋ-ਸਾਹਮਣੇ ਆਏ ਸਨ।
ਸੇਰੇਨਾ ਤੇ ਅਲਕਰਾਜ਼ ਯੂ ਐੱਸ ਓਪਨ ਮਿਕਸਡ ਡਬਲਜ਼ ਦੀ ਸ਼ੁਰੂਆਤ ਕਰਨਗੇ
ਨਿਊਯਾਰਕ: ਸੇਰੇਨਾ ਵਿਲੀਅਮਜ਼ ਅਤੇ ਕਾਰਲੋਸ ਅਲਕਰਾਜ਼ ਨੂੰ ਯੂ ਐੱਸ ਓਪਨ ਮਿਕਸਡ ਡਬਲਜ਼ ਚੈਂਪੀਅਨਸ਼ਿਪ ਵਿੱਚ ਆਪਣੇ ਪਹਿਲੇ ਵਿਰੋਧੀ ਬਾਰੇ ਜਾਣਨ ਲਈ ਥੋੜਾ ਹੋਰ ਇੰਤਜ਼ਾਰ ਕਰਨਾ ਪਵੇਗਾ। ਸੇਰੇਨਾ ਅਤੇ ਅਲਕਰਾਜ਼ ਦਾ ਮੁਕਾਬਲਾ ਐਤਵਾਰ ਨੂੰ ਉਸ ਟੀਮ ਨਾਲ ਤੈਅ ਹੋਇਆ ਹੈ ਜੋ ਸੋਮਵਾਰ ਨੂੰ ਖੇਡੇ ਜਾਣ ਵਾਲੇ ਅੱਠ ਟੀਮਾਂ ਦੇ ਕੁਆਲੀਫਾਇੰਗ ਟੂਰਨਾਮੈਂਟ ਵਿੱਚੋਂ ਅੱਗੇ ਵਧੇਗੀ। ਸੇਰੇਨਾ 2022 ਤੋਂ ਬਾਅਦ ਪਹਿਲੀ ਵਾਰ ਯੂ ਐੱਸ ਓਪਨ ਵਿੱਚ ਵਾਪਸੀ ਕਰ ਰਹੀ ਹੈ। ਛੇ ਵਾਰ ਦੀ ਸਿੰਗਲਜ਼ ਚੈਂਪੀਅਨ ਅਤੇ ਅਲਕਰਾਜ਼ ਜਿਸ ਨੇ ਦੋ ਵਾਰ ਪੁਰਸ਼ਾਂ ਦਾ ਖਿਤਾਬ ਜਿੱਤਿਆ ਹੈ, ਨੂੰ ਸ਼ਨਿਚਰਵਾਰ ਨੂੰ 16 ਟੀਮਾਂ ਦੇ ਇਸ ਟੂਰਨਾਮੈਂਟ ਲਈ ਵਾਈਲਡ ਕਾਰਡ ਦਿੱਤਾ ਗਿਆ ਸੀ। ਮਿਕਸਡ ਡਬਲਜ਼ ਦਾ ਪਹਿਲਾ ਗੇੜ ਅਤੇ ਕੁਆਰਟਰ ਫਾਈਨਲ ਮੰਗਲਵਾਰ ਨੂੰ ਹੋਣਗੇ, ਜਦੋਂ ਕਿ ਸੈਮੀ ਫਾਈਨਲ ਅਤੇ ਫਾਈਨਲ ਬੁੱਧਵਾਰ ਨੂੰ ਹੋਣਗੇ।
