ਵਾਸ਼ਿੰਗਟਨ : ਅਮਰੀਕੀ ਰਾਸ਼ਟਰਪਤੀ ਡੋਨਲਡ ਟਰੰਪ ਨੇ ਬੁੱਧਵਾਰ ਨੂੰ ਕਿਹਾ ਕਿ ਉਨ੍ਹਾਂ ਨੇ ਪਿਛਲੇ ਮਹੀਨੇ ਤੁਰਕੀ ਵਿੱਚ ਯੂ ਐੱਸ ਸੀਕਰੇਟ ਸਰਵਿਸ ਦੇ ਕਹਿਣ ਉੱਤੇ ਗੁਪਤ ਰੂਪ ਵਿੱਚ ਆਪਣਾ ਜਹਾਜ਼ ਬਦਲ ਲਿਆ ਸੀ, ਪਰ ਜਿਸ ਜਹਾਜ਼ ਉੱਤੇ ਉਨ੍ਹਾਂ ਨੇ ਅੰਤ ਵਿੱਚ ਉਡਾਣ ਭਰੀ, ਉਹ ਏਅਰ ਫੋਰਸ ਵਨ ਨਾਲੋਂ ਵੀ ਵੱਧ ਅਸੁਰੱਖਿਅਤ (ਖਤਰੇ ਵਾਲਾ) ਸੀ। ਅਮਰੀਕੀ ਮੀਡੀਆ ਦੀਆਂ ਰਿਪੋਰਟਾਂ ਅਨੁਸਾਰ, ਅੰਕਾਰਾ ਵਿੱਚ ਨਾਟੋ ਸਿਖਰ ਸੰਮੇਲਨ ਤੋਂ ਬਾਅਦ, ਟਰੰਪ ਨੂੰ ਇਰਾਨ ਵੱਲੋਂ ਮਿਲੀ ਜਾਨੋਂ ਮਾਰਨ ਦੀ ਧਮਕੀ ਦੇ ਮੱਦੇਨਜ਼ਰ ਏਅਰ ਫੋਰਸ ਵਨ ਤੋਂ ਇੱਕ ਮਿਲਟਰੀ ਜਹਾਜ਼ ਵਿੱਚ ਤਬਦੀਲ ਕਰ ਦਿੱਤਾ ਗਿਆ ਸੀ। ਵ੍ਹਾਈਟ ਹਾਊਸ ਨੇ ਇਸ ਤਬਦੀਲੀ ਦਾ ਖੁਲਾਸਾ ਨਹੀਂ ਕੀਤਾ ਸੀ ਅਤੇ ਇਹ ਉਦੋਂ ਤੱਕ ਗੁਪਤ ਰਿਹਾ ਜਦੋਂ ਤੱਕ ਸੋਮਵਾਰ ਨੂੰ ‘ਵਾਸ਼ਿੰਗਟਨ ਪੋਸਟ’ ਨੇ ਪਹਿਲੀ ਵਾਰ ਇਸ ਬਾਰੇ ਰਿਪੋਰਟ ਨਹੀਂ ਕੀਤੀ।
ਟਰੰਪ ਨੇ ਮੰਗਲਵਾਰ ਨੂੰ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਕਿਹਾ, “ਮੈਨੂੰ ਅਸਲ ਵਿੱਚ ਲੱਗਦਾ ਹੈ ਕਿ ਜਿਸ ਜਹਾਜ਼ ਉੱਤੇ ਮੈਂ ਸਫ਼ਰ ਕੀਤਾ, ਉਸ ਨੂੰ ਜ਼ਿਆਦਾ ਖ਼ਤਰਾ ਸੀ।” ਉਨ੍ਹਾਂ ਕਿਹਾ, “ਮੈਨੂੰ ਲੱਗਦਾ ਹੈ ਕਿ ਇਸ ਜਹਾਜ਼ ਨੂੰ ਵੱਡਾ ਖ਼ਤਰਾ ਇਸ ਲਈ ਸੀ ਕਿਉਂਕਿ ਇਹੀ ਉਹ ਜਹਾਜ਼ ਹੋਣਾ ਸੀ ਜਿਸ ਨੂੰ ਉਹ (ਇਰਾਨ) ਸਭ ਤੋਂ ਵੱਧ ਨਿਸ਼ਾਨਾ ਬਣਾਉਣਾ ਚਾਹੁੰਦੇ ਸਨ।”
ਸੋਸ਼ਲ ਮੀਡੀਆ ਉੱਤੇ ਟਰੰਪ ਦੇ ਕੈਟਰਿੰਗ ਟਰੱਕ ਵਿੱਚ ਲੁਕਣ ਦੀਆਂ ਮੀਮਜ਼ (ਤਸਵੀਰਾਂ) ਸਾਹਮਣੇ ਆਉਣ ਤੋਂ ਬਾਅਦ, ਆਪਣੀ ਛਵੀ ਪ੍ਰਤੀ ਸੁਚੇਤ ਰਾਸ਼ਟਰਪਤੀ (ਜੋ ਅਕਸਰ ਆਪਣੇ ਆਪ ਨੂੰ ਇੱਕ ਦਲੇਰ ਅਤੇ ਬਹਾਦਰ ਨੇਤਾ ਵਜੋਂ ਪੇਸ਼ ਕਰਨ ਵਾਲੇ ਮੀਮਜ਼ ਨੂੰ ਉਤਸ਼ਾਹਿਤ ਕਰਦੇ ਹਨ) ਨੇ ਕਿਹਾ ਕਿ ਉਹ ਰਾਸ਼ਟਰਪਤੀ ਦੀ ਰੱਖਿਆ ਕਰਨ ਵਾਲੀ ਏਜੰਸੀ ਸੀਕਰੇਟ ਸਰਵਿਸ ਦੀਆਂ ਹਦਾਇਤਾਂ ਦੀ ਪਾਲਣਾ ਕਰ ਰਹੇ ਸਨ।
ਟਰੰਪ ਨੇ ਕਿਹਾ, “ਖੈਰ, ਇਹ ਸਭ ਕੁਝ ਸੀਕਰੇਟ ਸਰਵਿਸ ਉੱਤੇ ਨਿਰਭਰ ਕਰਦਾ ਹੈ। ਮੈਂ ਉਹੀ ਕਰਦਾ ਹਾਂ ਜੋ ਉਹ ਕਰਨਾ ਚਾਹੁੰਦੇ ਹਨ, ਇਸ ਲਈ ਮੈਂ ਸੀਕਰੇਟ ਸਰਵਿਸ ਅਤੇ ਫ਼ੌਜ ਦੇ ਹਿਸਾਬ ਨਾਲ ਚਲਦਾ ਹਾਂ।”
ਟਰੰਪ ਨੇ ਕਿਹਾ, “ਮੈਨੂੰ ਲੱਗਦਾ ਹੈ ਕਿ ਉੱਥੇ ਕੋਈ ਖਤਰਾ ਸੀ। ਮੈਂ ਇਸ ਬਾਰੇ ਬਹੁਤ ਜ਼ਿਆਦਾ ਨਹੀਂ ਪੁੱਛਿਆ। ਮੈਨੂੰ ਬਹੁਤ ਸਾਰੀਆਂ ਧਮਕੀਆਂ ਮਿਲਦੀਆਂ ਹਨ।”
ਵ੍ਹਾਈਟ ਹਾਊਸ ਨੇ ਉਸ ਸਮੇਂ ਕਿਹਾ ਸੀ ਕਿ ਰਾਸ਼ਟਰਪਤੀ ਤੁਰਕੀ ਤੋਂ ਬ੍ਰਿਟੇਨ ਲਈ ਏਅਰ ਫੋਰਸ ਵਨ ਰਾਹੀਂ ਉਡਾਣ ਭਰ ਰਹੇ ਸਨ। ਪਰ ਰਿਪੋਰਟਾਂ ਨੇ ਸੋਮਵਾਰ ਨੂੰ ਸੂਤਰਾਂ ਦੇ ਹਵਾਲੇ ਨਾਲ ਦੱਸਿਆ ਕਿ ਟਰੰਪ ਦੇ ਜਹਾਜ਼ ਵਿੱਚ ਸਵਾਰ ਹੋਣ ਤੋਂ ਕੁਝ ਹੀ ਸਮੇਂ ਬਾਅਦ, ਉਹ ਇੱਕ ਕੈਟਰਿੰਗ ਟਰੱਕ ਰਾਹੀਂ ਗੁਪਤ ਰੂਪ ਵਿੱਚ ਉਸ ‘ਚੋਂ ਉਤਰ ਗਏ ਅਤੇ ਬ੍ਰਿਟੇਨ ਦੀ ਉਡਾਣ ਲਈ ਦੂਜੇ ਜਹਾਜ਼ ਵਿੱਚ ਸਵਾਰ ਹੋ ਗਏ।
ਟਰੰਪ ਨਾਟੋ ਸਿਖਰ ਸੰਮੇਲਨ ਲਈ ਕਤਰ ਵੱਲੋਂ ਤੋਹਫ਼ੇ ਵਿੱਚ ਦਿੱਤੇ ਗਏ ਜੈੱਟ ਵਿੱਚ ਅੰਕਾਰਾ ਗਏ ਸਨ, ਪਰ ਉਨ੍ਹਾਂ ਨੇ ਅਚਾਨਕ ਐਲਾਨ ਕੀਤਾ ਕਿ ਉਹ ਦੇਸ਼ ਛੱਡਣ ਵੇਲੇ ਪੁਰਾਣੇ ਏਅਰ ਫੋਰਸ ਵਨ ਦੀ ਵਰਤੋਂ ਕਰਨਗੇ। ਇਸ ਕਦਮ ਨੇ ਨਵੇਂ ਜਹਾਜ਼ ਦੀ ਸੁਰੱਖਿਆ ਬਾਰੇ ਸਵਾਲ ਖੜ੍ਹੇ ਕਰ ਦਿੱਤੇ ਸਨ। ਇਹ ਯਾਤਰਾ ਉਸ ਸਮੇਂ ਹੋਈ ਜਦੋਂ ਤੁਰਕੀ ਦੀ ਸਰਹੱਦ ਨਾਲ ਲੱਗਦੇ ਦੇਸ਼ ਇਰਾਨ ਨਾਲ ਤਣਾਅ ਵਧ ਗਿਆ ਸੀ।
