ਚੰਡੀਗੜ੍ਹ: ਵੀਡੀਓ-ਸ਼ੇਅਰਿੰਗ ਪਲੇਟਫਾਰਮ ਯੂਟਿਊਬ ਨੂੰ ਅੱਜ ਇੱਕ ਵੱਡੀ ਤਕਨੀਕੀ ਸਮੱਸਿਆ ਦਾ ਸਾਹਮਣਾ ਕਰਨਾ ਪਿਆ,ਜਿਸ ਕਾਰਨ ਕਈ ਦੇਸ਼ਾਂ ਦੇ ਲੱਖਾਂ ਉਪਭੋਗਤਾ ਵੀਡੀਓ ਅਤੇ ਹੋਰ ਸੇਵਾਵਾਂ ਦੀ ਵਰਤੋਂ ਕਰਨ ਵਿੱਚ ਅਸਮਰੱਥ ਰਹੇ। ਆਊਟੇਜ-ਟਰੈਕਿੰਗ ਵੈੱਬਸਾਈਟ ‘ਡਾਊਨਡਿਟੈਕਟਰ’ (Downdetector) ਅਨੁਸਾਰ ਇਕੱਲੇ ਸੰਯੁਕਤ ਰਾਜ ਵਿੱਚ 3,20,000 ਤੋਂ ਵੱਧ ਉਪਭੋਗਤਾਵਾਂ ਨੇ ਸਮੱਸਿਆਵਾਂ ਦੀ ਰਿਪੋਰਟ ਕੀਤੀ,ਜਿੱਥੇ ਐਪ ਅਤੇ ਵੈੱਬਸਾਈਟ ਦੀ ਵਰਤੋਂ ਕਰਨ ਵੇਲੇ ‘ਸਮਥਿੰਗ ਵੈਂਟ ਰੌਂਗ’ (Something Went Wrong) ਦਾ ਐਰਰ ਮੈਸੇਜ ਦਿਖਾਈ ਦੇ ਰਿਹਾ ਸੀ।
ਇਹ ਵਿਘਨ ਭਾਰਤ,ਯੂਨਾਈਟਿਡ ਕਿੰਗਡਮ ਅਤੇ ਕਈ ਹੋਰ ਦੇਸ਼ਾਂ ਵਿੱਚ ਵੀ ਦੇਖਿਆ ਗਿਆ,ਜੋ ਇਹ ਸੰਕੇਤ ਦਿੰਦਾ ਹੈ ਕਿ ਇਹ ਸਮੱਸਿਆ ਕਿਸੇ ਇੱਕ ਖੇਤਰ ਤੱਕ ਸੀਮਤ ਨਹੀਂ ਸੀ। ਇਸ ਦੇ ਨਾਲ ਹੀ ਯੂਟਿਊਬ ਟੀਵੀ (YouTube TV) ਵੀ ਪ੍ਰਭਾਵਿਤ ਹੋਇਆ,ਜਿਸ ਦੀਆਂ ਲਗਪਗ 10,000 ਸ਼ਿਕਾਇਤਾਂ ਦਰਜ ਕੀਤੀਆਂ ਗਈਆਂ। ਟੀਮ ਯੂਟਿਊਬ ਨੇ ਇਸ ਸਮੱਸਿਆ ਦੀ ਪੁਸ਼ਟੀ ਕਰਦਿਆਂ ਕਿਹਾ ਕਿ ਉਹ ਮਾਮਲੇ ਦੀ ਜਾਂਚ ਕਰ ਰਹੇ ਹਨ ਅਤੇ ਜਲਦੀ ਹੀ ਅਪਡੇਟ ਸਾਂਝਾ ਕਰਨਗੇ,ਹਾਲਾਂਕਿ ਕੰਪਨੀ ਨੇ ਅਜੇ ਤੱਕ ਖਰਾਬੀ ਦੇ ਕਾਰਨ ਜਾਂ ਸੇਵਾਵਾਂ ਪੂਰੀ ਤਰ੍ਹਾਂ ਬਹਾਲ ਹੋਣ ਦੇ ਸਮੇਂ ਬਾਰੇ ਕੋਈ ਜਾਣਕਾਰੀ ਨਹੀਂ ਦਿੱਤੀ ਹੈ। ਦੂਜੇ ਪਾਸੇ,ਸੋਸ਼ਲ ਮੀਡੀਆ ‘ਤੇ ਉਪਭੋਗਤਾਵਾਂ ਨੇ ਇਸ ਸਥਿਤੀ ‘ਤੇ ਮੀਮਜ਼ ਅਤੇ ਚੁਟਕਲਿਆਂ ਰਾਹੀਂ ਹਾਸੋਹੀਣੀ ਪ੍ਰਤੀਕਿਰਿਆ ਦਿੱਤੀ ਹੈ। ਇਸ ਸਮੱਸਿਆ ਨੇ ਯੂਟਿਊਬ ਦੇ ਹੋਮਪੇਜ, ਮੋਬਾਈਲ ਐਪ, ਯੂਟਿਊਬ ਮਿਊਜ਼ਿਕ ਅਤੇ ਯੂਟਿਊਬ ਕਿਡਜ਼ ਨੂੰ ਮੁੱਖ ਰੂਪ ਵਿੱਚ ਪ੍ਰਭਾਵਿਤ ਕੀਤਾ। ਕੰਪਨੀ ਨੇ ਸੋਸ਼ਲ ਮੀਡੀਆ ਰਾਹੀਂ ਤਾਜ਼ਾ ਅਪਡੇਟ ਦਿੰਦਿਆਂ ਦੱਸਿਆ ਕਿ ਹਾਲਾਂਕਿ ਹੋਮਪੇਜ ਨੂੰ ਬਹਾਲ ਕਰ ਦਿੱਤਾ ਗਿਆ ਹੈ, ਪਰ ਇਸ ਦੇ ਪੂਰਨ ਹੱਲ ਲਈ ਅਜੇ ਵੀ ਕੰਮ ਜਾਰੀ ਹੈ।
