ਨਵੀਂ ਦਿੱਲੀ: ਕੌਮੀਂ ਮਹਿਲਾ ਕਮਿਸ਼ਨ (NCW) ਨੇ ਮਹਾਰਾਸ਼ਟਰ ਦੇ ਨਾਸਿਕ ਸਥਿਤ ਟਾਟਾ ਕੰਸਲਟੈਂਸੀ ਸਰਵਿਸਿਜ਼ (TCS) ਦੇ ਬੀਪੀਓ ਯੂਨਿਟ ਵਿੱਚ ਮਹਿਲਾ ਕਰਮਚਾਰੀਆਂ ਨਾਲ ਕਥਿਤ ਜਿਨਸੀ ਸ਼ੋਸ਼ਣ ਦੇ ਮਾਮਲਿਆਂ ਦਾ ਗੰਭੀਰ ਨੋਟਿਸ ਲਿਆ ਹੈ। ਕਮਿਸ਼ਨ ਨੇ ਇਸ ਮਾਮਲੇ ਦੀ ਡੂੰਘਾਈ ਨਾਲ ਜਾਂਚ ਕਰਨ ਲਈ ਇੱਕ ਉੱਚ-ਪੱਧਰੀ ਤੱਥ-ਖੋਜ ਕਮੇਟੀ ਬਣਾਈ ਹੈ, ਜੋ 18 ਅਪਰੈਲ ਨੂੰ ਨਾਸਿਕ ਸਥਿਤ ਕੇਂਦਰ ਦਾ ਦੌਰਾ ਕਰੇਗੀ। ਬੁੱਧਵਾਰ ਨੂੰ ਜਾਰੀ ਕੀਤੇ ਇੱਕ ਬਿਆਨ ਵਿੱਚ ਕਮਿਸ਼ਨ ਨੇ ਦੱਸਿਆ ਕਿ ਇਹ ਟੀਮ ਘਟਨਾ ਵਾਲੀ ਥਾਂ ’ਤੇ ਜਾ ਕੇ ਹਾਲਾਤ ਦਾ ਜਾਇਜ਼ਾ ਲਵੇਗੀ ਅਤੇ ਅਧਿਕਾਰੀਆਂ ਵੱਲੋਂ ਕੀਤੀ ਗਈ ਕਾਰਵਾਈ ਦੀ ਸਮੀਖਿਆ ਕਰੇਗੀ। ਕਮੇਟੀ ਵੱਲੋਂ ਆਪਣੀ ਰਿਪੋਰਟ 10 ਕੰਮਕਾਜੀ ਦਿਨਾਂ ਦੇ ਅੰਦਰ ਸੌਂਪੀ ਜਾਵੇਗੀ। ਜ਼ਿਕਰਯੋਗ ਹੈ ਕਿ 25 ਮਾਰਚ ਤੋਂ ਹੁਣ ਤੱਕ ਇਸ ਮਾਮਲੇ ਵਿੱਚ ਜਿਨਸੀ ਸ਼ੋਸ਼ਣ ਅਤੇ ਧਾਰਮਿਕ ਦਬਾਅ ਬਣਾਉਣ ਦੇ ਸਬੰਧ ਵਿੱਚ 9 ਐਫਆਈਆਰ (FIR) ਦਰਜ ਕੀਤੀਆਂ ਜਾ ਚੁੱਕੀਆਂ ਹਨ।
ਪੁਲੀਸ ਨੇ ਗੁਪਤ ਮੁਹਿੰਮ ਰਾਹੀਂ ਕੀਤਾ ਪਰਦਾਫਾਸ਼
ਨਾਸਿਕ ਪੁਲੀਸ ਨੇ ਫਰਵਰੀ ਦੇ ਅੱਧ ਤੋਂ ਲਗਭਗ 40 ਦਿਨਾਂ ਤੱਕ ਇੱਕ ਗੁਪਤ (ਅੰਡਰਕਵਰ) ਅਪਰੇਸ਼ਨ ਚਲਾਇਆ ਸੀ, ਜਿਸ ਵਿੱਚ ਸ਼ੋਸ਼ਣ ਦੀ ਪੁਸ਼ਟੀ ਹੋਈ। ਕਮਿਸ਼ਨ ਨੇ ਕਿਹਾ, “ ਰਿਪੋਰਟਾਂ ਮੁਤਾਬਕ ਧਾਰਮਿਕ ਰੀਤੀ-ਰਿਵਾਜਾਂ ਨਾਲ ਸਬੰਧਤ ਇੱਕ ਸ਼ਿਕਾਇਤ ਤੋਂ ਸ਼ੁਰੂ ਹੋਈ ਜਾਂਚ ਵਿੱਚ ਜਿਨਸੀ ਸ਼ੋਸ਼ਣ, ਜਬਰ-ਜ਼ਨਾਹ ਅਤੇ ਸੁਪਰਵਾਈਜ਼ਰੀ ਭੂਮਿਕਾਵਾਂ ਵਿੱਚ ਬੈਠੇ ਵਿਅਕਤੀਆਂ ਵੱਲੋਂ ਮਹਿਲਾ ਮੁਲਾਜ਼ਮਾਂ ਦੇ ਜ਼ਬਰਦਸਤੀ ਧਰਮ ਪਰਿਵਰਤਨ ਦੀਆਂ ਕੋਸ਼ਿਸ਼ਾਂ ਵਰਗੇ ਖ਼ੌਫ਼ਨਾਕ ਦੋਸ਼ ਸਾਹਮਣੇ ਆਏ ਹਨ।” ਪੁਲੀਸ ਮੁਤਾਬਕ ਹੁਣ ਤੱਕ 7 ਮੁਲਾਜ਼ਮਾਂ ਨੂੰ ਗ੍ਰਿਫ਼ਤਾਰ ਕੀਤਾ ਜਾ ਚੁੱਕਾ ਹੈ ਅਤੇ ਇੱਕ ਐੱਚਆਰ ਮੈਨੇਜਰ ਪੁਲੀਸ ਰਿਮਾਂਡ ’ਤੇ ਹੈ, ਜਿਸ ਨੇ ਪੀੜਤ ਦੀ ਸ਼ਿਕਾਇਤ ਨੂੰ ਅਣਗੌਲਿਆ ਕੀਤਾ ਸੀ।
ਜਾਂਚ ਟੀਮ ਵਿੱਚ ਨਾਮੀ ਸ਼ਖ਼ਸੀਅਤਾਂ ਸ਼ਾਮਲ
ਇਸ ਕਮੇਟੀ ਵਿੱਚ ਬੰਬੇ ਹਾਈ ਕੋਰਟ ਦੀ ਸਾਬਕਾ ਜੱਜ ਸਾਧਨਾ ਜਾਧਵ, ਹਰਿਆਣਾ ਦੇ ਸਾਬਕਾ ਡੀਜੀਪੀ ਬੀ.ਕੇ. ਸਿਨਹਾ, ਸੁਪਰੀਮ ਕੋਰਟ ਦੀ ਸੀਨੀਅਰ ਵਕੀਲ ਮੋਨਿਕਾ ਅਰੋੜਾ ਅਤੇ ਕਮਿਸ਼ਨ ਦੀ ਸੀਨੀਅਰ ਕੋਆਰਡੀਨੇਟਰ ਲੀਲਾਬਤੀ ਸ਼ਾਮਲ ਹਨ। ਕਮਿਸ਼ਨ ਨੇ ਸਪੱਸ਼ਟ ਕੀਤਾ ਹੈ ਕਿ ਉਹ ਪੀੜਤਾਂ, ਪੁਲੀਸ ਅਤੇ ਕੰਪਨੀ ਪ੍ਰਤੀਨਿਧਾਂ ਨਾਲ ਗੱਲਬਾਤ ਤੋਂ ਇਲਾਵਾ ਲੋੜ ਪੈਣ ’ਤੇ ਹੋਰ ਥਾਵਾਂ ’ਤੇ ਵੀ ਜਾਂਚ ਕਰ ਸਕਦੇ ਹਨ। ਟਾਟਾ ਸੰਨਜ਼ ਦੇ ਚੇਅਰਮੈਨ ਐੱਨ. ਚੰਦਰਸ਼ੇਖਰਨ ਨੇ ਕਿਹਾ ਹੈ ਕਿ ਕੰਪਨੀ ਇਸ ਮਾਮਲੇ ਨੂੰ ਬੇਹੱਦ ਗੰਭੀਰਤਾ ਨਾਲ ਲੈ ਰਹੀ ਹੈ ਅਤੇ ਅੰਦਰੂਨੀ ਜਾਂਚ ਜਾਰੀ ਹੈ। ਇਸ ਦੇ ਨਾਲ ਹੀ ਨਾਸਿਕ ਕਲੈਕਟਰ ਦਫ਼ਤਰ ਨੇ ਵੀ ‘ਪੋਸ਼’ (POSH) ਐਕਟ, 2013 ਤਹਿਤ ਸਮਾਨੰਤਰ ਜਾਂਚ ਸ਼ੁਰੂ ਕਰ ਦਿੱਤੀ ਹੈ ਤਾਂ ਜੋ ਕੰਮ ਵਾਲੀ ਥਾਂ ’ਤੇ ਔਰਤਾਂ ਦੀ ਸੁਰੱਖਿਆ ਯਕੀਨੀ ਬਣਾਈ ਜਾ ਸਕੇ।
