ਨਵੀਂ ਦਿੱਲੀ : ਸੀਬੀਆਈ (CBI) ਨੇ ਇੱਕ ਕਥਿਤ ਬਹਿਰੂਪੀਏ ਖ਼ਿਲਾਫ਼ ਮਾਮਲਾ ਦਰਜ ਕੀਤਾ ਹੈ,ਜਿਸ ਨੇ ਪ੍ਰਧਾਨ ਮੰਤਰੀ ਦਫ਼ਤਰ (PMO) ਵਿੱਚ ਸੀਨੀਅਰ ਅਧਿਕਾਰੀ ਹੋਣ ਦਾ ਢੌਂਗ ਰਚ ਕੇ ਇੱਕ ਸੀਸੀਟੀਵੀ ਕੰਪਨੀ ’ਤੇ ਭਾਰੀ ਛੋਟ ਵਾਲੀਆਂ ਦਰਾਂ ’ਤੇ ਉਪਕਰਨ ਅਤੇ ਸੇਵਾਵਾਂ ਮੁਹੱਈਆ ਕਰਵਾਉਣ ਲਈ ਦਬਾਅ ਪਾਇਆ। ਪ੍ਰਧਾਨ ਮੰਤਰੀ ਦਫ਼ਤਰ (PMO) ਦੀ ਸ਼ਿਕਾਇਤ ਦੇ ਆਧਾਰ ’ਤੇ ਏਜੰਸੀ ਨੇ ਮਨੀਸ਼ ਕੁਮਾਰ ਉਰਫ਼ ਮਨੀਸ਼ ਕੁਮਾਰ ਗੁਪਤਾ ਖ਼ਿਲਾਫ਼ ਐਫਆਈਆਰ (FIR) ਦਰਜ ਕੀਤੀ ਹੈ,ਜੋ ਕਥਿਤ ਤੌਰ ’ਤੇ ਦਫ਼ਤਰ ਵਿੱਚ ਸੰਯੁਕਤ ਸਕੱਤਰ (ਜੁਆਇੰਟ ਸੈਕਟਰੀ) ਵਜੋਂ ਆਪਣੀ ਪਛਾਣ ਦੱਸ ਰਿਹਾ ਸੀ ਅਤੇ ਇੱਕ ਨਾਮਵਰ ਸੀਸੀਟੀਵੀ ਕੰਪਨੀ ’ਤੇ ਪ੍ਰਭਾਵ ਪਾਉਣ ਲਈ ਇਸ ਕਥਿਤ ਅਹੁਦੇ ਦੀ ਦੁਰਵਰਤੋਂ ਕਰ ਰਿਹਾ ਸੀ। ਐਫਆਈਆਰ ਵਿੱਚ ਦੋਸ਼ ਲਾਇਆ ਗਿਆ ਹੈ ਕਿ ਗੁਪਤਾ ਨੇ ਸੀਪੀ ਪਲੱਸ (CP Plus) ਦੇ ਮੈਨੇਜਿੰਗ ਡਾਇਰੈਕਟਰ ਆਦਿੱਤਿਆ ਖੇਮਕਾ ਨਾਲ ਵੱਟਸਐਪ ਰਾਹੀਂ ਸੰਪਰਕ ਕੀਤਾ ਅਤੇ ਖ਼ੁਦ ਨੂੰ ਪੀਐੱਮਓ ਵਿੱਚ ਸੰਯੁਕਤ ਸਕੱਤਰ (ਪ੍ਰਸ਼ਾਸਨ) ਦੱਸਿਆ। ਉਸ ਨੇ ਕਥਿਤ ਤੌਰ ’ਤੇ ਕੰਪਨੀ ਨੂੰ ਗਾਜ਼ੀਆਬਾਦ ਦੇ ਇੰਦਰਾਪੁਰਮ ਸਥਿਤ ਗੌਰ ਗ੍ਰੀਨ ਐਵੇਨਿਊ ਵਿਖੇ ਆਪਣੇ ਮਾਪਿਆਂ ਦੀ ਰਿਹਾਇਸ਼ ’ਤੇ ਇਨਡੋਰ ਅਤੇ ਆਊਟਡੋਰ ਸੀਸੀਟੀਵੀ ਨਿਗਰਾਨੀ ਉਪਕਰਨਾਂ ਦਾ ਪ੍ਰਬੰਧ ਕਰਨ ਅਤੇ ਲਗਾਉਣ ਦੇ ਨਿਰਦੇਸ਼ ਦਿੱਤੇ। ਉਸ ਨੇ ਕਥਿਤ ਤੌਰ ’ਤੇ ਆਪਣੇ ਭਰਾ ਮੁਕੇਸ਼ ਕੁਮਾਰ ਗੁਪਤਾ ਦਾ ਪਤਾ ਅਤੇ ਸੰਪਰਕ ਵੇਰਵੇ ਵੀ ਮੁਹੱਈਆ ਕਰਵਾਏ।
ਐਫਆਈਆਰ ਅਨੁਸਾਰ,ਜਦੋਂ ਸੀਪੀ ਪਲੱਸ ਦੇ ਅਧਿਕਾਰੀਆਂ ਨੇ ਸਪੱਸ਼ਟੀਕਰਨ ਮੰਗਿਆ,ਤਾਂ ਗੁਪਤਾ ਨੇ ਆਪਣੇ ਆਈਏਐਸ (IAS) ਅਧਿਕਾਰੀ ਭਰਾ ਲਈ ਲਾਜ਼ਮੀ ‘ਪ੍ਰੋਟੋਕੋਲ’ ਦਾ ਹਵਾਲਾ ਦਿੰਦੇ ਹੋਏ ਧਮਕੀ ਦਿੱਤੀ ਕਿ ਜੇਕਰ ਸੀਸੀਟੀਵੀ ਲਗਾਉਣ ਦਾ ਕੰਮ ਤੁਰੰਤ ਮੁਫ਼ਤ ਜਾਂ ਬਹੁਤ ਹੀ ਘੱਟ ਦਰਾਂ ’ਤੇ ਪੂਰਾ ਨਾ ਕੀਤਾ ਗਿਆ ਤਾਂ ਇਸ ਦੇ ‘ਭਿਆਨਕ’ ਨਤੀਜੇ ਭੁਗਤਣੇ ਪੈਣਗੇ।
ਐਫਆਈਆਰ ਵਿੱਚ ਦੋਸ਼ ਲਾਇਆ ਗਿਆ ਹੈ,“ਧਮਕੀ ਅਤੇ ਸਰਕਾਰੀ ਬਦਲੇ ਦੀ ਕਾਰਵਾਈ ਦੇ ਡਰ ਕਾਰਨ,ਸੀਪੀ ਪਲੱਸ ਦੇ ਕਰਮਚਾਰੀਆਂ ਅਤੇ ਉਨ੍ਹਾਂ ਦੇ ਸੀਆਰਐਮ (CRM) ਸੈਕਸ਼ਨ ਨੇ ਸਬੰਧਤ ਵੈਂਡਰ ਸ੍ਰੀ ਅਨੁਪਮ ਕੁਮਾਰ ਗੁਪਤਾ (ਮੈਸਰਜ਼ ਸੇਕੁਆ ਟੈਕਨਾਲੋਜੀ) ਨੂੰ ਸਾਈਟ ਦੇ ਸਰਵੇਖਣ ਨੂੰ ਤਰਜੀਹ ਦੇਣ ਅਤੇ ਭਾਰੀ ਛੋਟ ਵਾਲੇ ਅਨੁਮਾਨ (ਐਸਟੀਮੇਟ) ਪੇਸ਼ ਕਰਨ ਦੇ ਨਿਰਦੇਸ਼ ਦਿੱਤੇ।”
ਇਸ ਵਿੱਚ ਅੱਗੇ ਦਾਅਵਾ ਕੀਤਾ ਗਿਆ ਹੈ ਕਿ ਜਦੋਂ ਵੈਂਡਰ ਨੇ ਲਾਗਤ ਨੂੰ ਹੋਰ ਘਟਾਉਣ ਵਿੱਚ ਅਸਮਰੱਥਾ ਪ੍ਰਗਟਾਈ,ਤਾਂ ਗੁਪਤਾ ਨੇ ਇਸ ਮਾਮਲੇ ਨੂੰ ਸਿੱਧੇ ਸੀਪੀ ਪਲੱਸ ਦੇ ਮਾਲਕ ਕੋਲ ਲਿਜਾਣ ਦੀ ਧਮਕੀ ਦਿੱਤੀ,ਜਿਸ ਕਾਰਨ ਗੰਭੀਰ ਵਪਾਰਕ ਦਬਾਅ ਅਤੇ ਪਰੇਸ਼ਾਨੀ ਕਾਰਨ ਵੈਂਡਰ ਨੂੰ ਕੰਮ ਰੋਕਣਾ ਪਿਆ। ਏਜੰਸੀ ਨੇ ਦੱਸਿਆ ਕਿ ਪੀਐੱਮਓ ਨੇ ਉਨ੍ਹਾਂ ਨੂੰ ਪੁਸ਼ਟੀ ਕੀਤੀ ਹੈ ਕਿ ਮਨੀਸ਼ ਕੁਮਾਰ ਨਾਮ ਦੇ ਕਿਸੇ ਵੀ ਅਧਿਕਾਰੀ ਨੇ ਅੱਜ ਤੱਕ ਪੀਐੱਮਓ ਵਿੱਚ ਸੰਯੁਕਤ ਸਕੱਤਰ ਜਾਂ ਕਿਸੇ ਵੀ ਅਧਿਕਾਰਤ ਸਮਰੱਥਾ ਵਿੱਚ ਸੇਵਾ ਨਹੀਂ ਨਿਭਾਈ ਹੈ।
