ਨਵੀਂ ਦਿੱਲੀ : ਦਿੱਲੀ-ਐਨਸੀਆਰ ਦੇ ਬਹੁਤੇ ਘਰਾਂ ਵਿੱਚ ਸਵੇਰ ਦੀ ਸ਼ੁਰੂਆਤ ਮਦਰ ਡੇਅਰੀ ਦੇ ਦੁੱਧ ਦੀ ਥੈਲੀ ਨਾਲ ਹੁੰਦੀ ਹੈ। ਪਰ ਇਸ ਵਾਰ ਵਿਸ਼ਵ ਵਾਤਾਵਰਣ ਦਿਵਸ ਤੋਂ ਇਹ ਜਾਣੀ-ਪਛਾਣੀ ਥੈਲੀ ਇੱਕ ਨਵੇਂ ਰੂਪ ਵਿੱਚ ਨਜ਼ਰ ਆਵੇਗੀ। ਇਹ ਬਦਲਾਅ ਸਿਰਫ਼ ਦਿਖਣ ਵਿੱਚ ਹੀ ਨਹੀਂ, ਸਗੋਂ ਗਾਹਕਾਂ ਨਾਲ ਜਜ਼ਬਾਤੀ ਸਾਂਝ ਪਾਉਣ ਲਈ ਵੀ ਕੀਤਾ ਗਿਆ ਹੈ। ਮਦਰ ਡੇਅਰੀ ਨੇ ਆਪਣੇ ਦੁੱਧ ਦੇ ਪੋਰਟਫੋਲੀਓ ਲਈ ਇੱਕ ਬਿਲਕੁਲ ਨਵਾਂ ਡਿਜ਼ਾਈਨ ਪੇਸ਼ ਕੀਤਾ ਹੈ, ਜਿਸ ਦੀ ਸ਼ੁਰੂਆਤ ਉਨ੍ਹਾਂ ਦੇ ਸਭ ਤੋਂ ਵੱਧ ਵਿਕਣ ਵਾਲੇ ‘ਕਾਊ ਮਿਲਕ’ (ਗਾਂ ਦੇ ਦੁੱਧ) ਤੋਂ ਕੀਤੀ ਗਈ ਹੈ। ਜਿੱਥੇ ਕੰਪਨੀ ਭਾਰਤ ਦੀ ਪਹਿਲੀ ਕੁਦਰਤੀ ਤੌਰ ’ਤੇ ਨਸ਼ਟ ਹੋਣ ਵਾਲੀ (biodegradable) ਦੁੱਧ ਦੀ ਥੈਲੀ ਲਿਆ ਕੇ ਸੁਰਖੀਆਂ ਬਟੋਰ ਰਹੀ ਹੈ, ਉੱਥੇ ਹੀ ਉਹ ਰਸੋਈ ਦੀਆਂ ਸ਼ੈਲਫਾਂ ’ਤੇ ਬ੍ਰਾਂਡ ਦੀ ਪਛਾਣ ਨੂੰ ਵੀ ਨਵਾਂ ਰੂਪ ਦੇ ਰਹੀ ਹੈ।
ਇਸ ਨਵੇਂ ਡਿਜ਼ਾਈਨ ਦੇ ਕੇਂਦਰ ਵਿੱਚ ਇੱਕ ਖ਼ਾਸ ਪਹਿਲਕਦਮੀ ਹੈ ਜਿਸ ਨੂੰ ‘ਨੋਟ ਆਫ਼ ਕੇਅਰ’ (ਪਿਆਰ ਭਰਿਆ ਸੁਨੇਹਾ) ਦਾ ਨਾਂ ਦਿੱਤਾ ਗਿਆ ਹੈ, ਜੋ ਮਦਰ ਡੇਅਰੀ ਦੇ ਆਈਕੋਨਿਕ ਲੋਗੋ ਤੋਂ ਪ੍ਰੇਰਿਤ ਹੈ। ਇਸ ਪਿੱਛੇ ਵਿਚਾਰ ਬਹੁਤ ਸਾਦਾ ਤੇ ਪਿਆਰਾ ਹੈ- ਰੋਜ਼ਾਨਾ ਵਰਤੀ ਜਾਣ ਵਾਲੀ ਦੁੱਧ ਦੀ ਥੈਲੀ ਨੂੰ ਇੱਕ ਅਜਿਹੇ ਸੁਨੇਹੇ ਵਿੱਚ ਬਦਲ ਦੇਣਾ, ਜੋ ਮਾਂ ਦੇ ਨਿੱਘ ਅਤੇ ਪਿਆਰ ਦੀ ਯਾਦ ਦਿਵਾਏ। ਹੁਣ ਦੁੱਧ ਦੀ ਪੈਕੇਜਿੰਗ ’ਤੇ ਰਵਾਇਤੀ ਬ੍ਰਾਂਡਿੰਗ ਦੇ ਨਾਲ-ਨਾਲ ਖਪਤਕਾਰਾਂ ਨੂੰ ‘ਦੁੱਧ ਪੀ ਲਓ’ ਜਾਂ ‘ਘਰ ਸੁਰੱਖਿਅਤ ਪਹੁੰਚਣਾ’ ਵਰਗੇ ਰੋਜ਼ਾਨਾ ਸੁਣੇ ਜਾਣ ਵਾਲੇ ਸੁਨੇਹੇ ਦੇਖਣ ਨੂੰ ਮਿਲਣਗੇ। ਇਹ ਬਿਲਕੁਲ ਉਹੀ ਫ਼ਿਕਰ ਹੈ ਜੋ ਹਰ ਬੱਚਾ ਆਪਣੇ ਘਰ ਵਿੱਚ ਮਾਂ ਦੇ ਮੂੰਹੋਂ ਸੁਣਦਿਆਂ ਵੱਡਾ ਹੁੰਦਾ ਹੈ। ਕੰਪਨੀ ਦਾ ਕਹਿਣਾ ਹੈ ਕਿ ਇਹ ਛੋਟੇ-ਛੋਟੇ ਸੁਨੇਹੇ ਪੈਕੇਜਿੰਗ ਨੂੰ ਵਧੇਰੇ ਨਿੱਜੀ ਅਹਿਸਾਸ ਦੇਣਗੇ, ਜੋ ਉਨ੍ਹਾਂ ਦੇ ‘ਮਾਂ ਜੈਸੀ ਕੇਅਰ’ (ਮਾਂ ਵਰਗੀ ਦੇਖਭਾਲ) ਦੇ ਸਾਲਾਂ ਪੁਰਾਣੇ ਵਾਅਦੇ ਨੂੰ ਦਰਸਾਉਂਦਾ ਹੈ।
