ਪੁਣੇ: ਮਰਹੂਮ ਅਜੀਤ ਪਵਾਰ ਦੇ ਸਪੁੱਤਰ ਜੈ ਪਵਾਰ ਨੇ ਹਾਲ ਹੀ ਵਿੱਚ ਹੋਏ ਜਹਾਜ਼ ਹਾਦਸੇ ਦੇ ਸਬੰਧ ਵਿੱਚ ਏਅਰਕ੍ਰਾਫਟ ਐਕਸੀਡੈਂਟ ਇਨਵੈਸਟੀਗੇਸ਼ਨ ਬਿਊਰੋ (AAIB) ਦੁਆਰਾ ਜਾਰੀ ਮੁੱਢਲੀ ਰਿਪੋਰਟ ‘ਤੇ ਸਵਾਲ ਖੜ੍ਹੇ ਕੀਤੇ ਹਨ, ਜਿਸ ਵਿੱਚ ਮਹਾਰਾਸ਼ਟਰ ਦੇ ਸਾਬਕਾ ਉਪ ਮੁੱਖ ਮੰਤਰੀ ਅਜੀਤ ਪਵਾਰ ਦੀ ਮੌਤ ਹੋ ਗਈ ਸੀ।
ਜੈ ਪਵਾਰ ਨੇ ਸੁਰੱਖਿਆ ਖਾਮੀਆਂ ਸਾਬਤ ਹੋਣ ’ਤੇ ਵੀ ਐੱਸ ਆਰ (VSR) ਵੈਂਚਰਸ ਵਿਰੁੱਧ ਸਖ਼ਤ ਕਾਰਵਾਈ ਦੀ ਮੰਗ ਕੀਤੀ ਹੈ। ਇੰਸਟਾਗ੍ਰਾਮ ’ਤੇ ਇੱਕ ਪੋਸਟ ਵਿੱਚ ਪਵਾਰ ਨੇ ਮੁੱਢਲੀ ਜਾਂਚ ਦੇ ਨਤੀਜਿਆਂ ‘ਤੇ ਅਸੰਤੁਸ਼ਟੀ ਜ਼ਾਹਰ ਕੀਤੀ ਅਤੇ ਪਾਰਦਰਸ਼ਤਾ ਅਤੇ ਵਿਆਪਕ ਜਵਾਬਾਂ ਦੀ ਮੰਗ ਕੀਤੀ। ਉਨ੍ਹਾਂ ਕਿਹਾ, “ਮੈਂ AAIB ਦੁਆਰਾ ਜਾਂਚੀ ਗਈ ਮੁੱਢਲੀ ਰਿਪੋਰਟ ਪੜ੍ਹੀ ਹੈ। ਇਹ ਦੇਖ ਕੇ ਕਿ ਇਹ ਰਿਪੋਰਟ ਪੂਰੀ ਤਰ੍ਹਾਂ ਅਤੇ ਡੂੰਘਾਈ ਨਾਲ ਤਿਆਰ ਨਹੀਂ ਕੀਤੀ ਗਈ ਹੈ, ਮੈਨੂੰ ਡੂੰਘਾ ਅਫਸੋਸ ਅਤੇ ਦੁੱਖ ਹੋਇਆ ਹੈ। ਮਹਾਰਾਸ਼ਟਰ ਦੇ ਲੋਕ, ਅਤੇ ਨਾਲ ਹੀ ਉਹ ਸਾਰੇ ਪਰਿਵਾਰ ਜਿਨ੍ਹਾਂ ਨੇ ਇਸ ਹਾਦਸੇ ਵਿੱਚ ਆਪਣੇ ਪਿਆਰਿਆਂ ਨੂੰ ਗੁਆ ਦਿੱਤਾ ਹੈ, ਸਿਰਫ ਰਸਮੀ ਜਾਣਕਾਰੀ ਦੇ ਹੀ ਨਹੀਂ, ਬਲਕਿ ਸੱਚਾਈ, ਪਾਰਦਰਸ਼ਤਾ ਅਤੇ ਵਿਆਪਕ ਜਵਾਬਾਂ ਦੇ ਹੱਕਦਾਰ ਹਨ।”
ਉਨ੍ਹਾਂ ਨੇ ਡਾਇਰੈਕਟੋਰੇਟ ਜਨਰਲ ਆਫ ਸਿਵਲ ਐਵੀਏਸ਼ਨ (DGCA) ਵੱਲੋਂ ਵੀਐਸਆਰ ਵੈਂਚਰਸ ਵਿਰੁੱਧ ਕੀਤੀ ਗਈ ਕਾਰਵਾਈ ’ਤੇ ਵੀ ਚਿੰਤਾ ਜ਼ਾਹਰ ਕੀਤੀ ਅਤੇ ਸੁਝਾਅ ਦਿੱਤਾ ਕਿ ਕਮੀਆਂ ਸਿਰਫ ਕੁਝ ਜਹਾਜ਼ਾਂ ਤੱਕ ਸੀਮਤ ਨਹੀਂ ਹੋ ਸਕਦੀਆਂ। ਉਨ੍ਹਾਂ ਅੱਗੇ ਕਿਹਾ, “ਜਿਨ੍ਹਾਂ ਮੁੱਦਿਆਂ ਦੇ ਆਧਾਰ ‘ਤੇ ਡੀਜੀਸੀਏ ਨੇ ਵੀਐਸਆਰ ਵੈਂਚਰਸ ਦੇ ਕੁਝ ਜਹਾਜ਼ਾਂ ਨੂੰ ਗਰਾਊਂਡ ਕੀਤਾ ਹੈ, ਅਸੀਂ ਇਸ ਸੰਭਾਵਨਾ ਤੋਂ ਇਨਕਾਰ ਨਹੀਂ ਕਰ ਸਕਦੇ ਕਿ ਦੂਜੇ ਜਹਾਜ਼ਾਂ ਵਿੱਚ ਵੀ ਅਜਿਹੀਆਂ ਹੀ ਕਮੀਆਂ ਹੋ ਸਕਦੀਆਂ ਹਨ।”
ਗੰਭੀਰ ਖਾਮੀਆਂ ਪਾਏ ਜਾਣ ‘ਤੇ ਸਖ਼ਤ ਉਪਾਵਾਂ ਦੀ ਮੰਗ ਕਰਦਿਆਂ ਪਵਾਰ ਨੇ ਕਿਹਾ, “ਜੇਕਰ ਸੁਰੱਖਿਆ ਨਾਲ ਸਬੰਧਤ ਨਿਯਮਾਂ ਅਤੇ ਪ੍ਰਕਿਰਿਆਵਾਂ ਵਿੱਚ ਗੰਭੀਰ ਲਾਪਰਵਾਹੀ ਪਾਈ ਜਾਂਦੀ ਹੈ, ਤਾਂ ਸਿਰਫ਼ ਕੁਝ ਜਹਾਜ਼ਾਂ ਤੱਕ ਸੀਮਤ ਕਾਰਵਾਈ ਕਰਨ ਦੀ ਬਜਾਏ, ਪੂਰੇ ਵੀਐਸਆਰ ਫਲੀਟ ਦੇ ਸਬੰਧ ਵਿੱਚ ਸਖ਼ਤ ਫੈਸਲਾ ਲੈਣ ਦੀ ਲੋੜ ਹੈ। ਯਾਤਰੀਆਂ ਦੀ ਸੁਰੱਖਿਆ ਨੂੰ ਸਰਵਉੱਚ ਤਰਜੀਹ ਦਿੰਦੇ ਹੋਏ, ਡੀਜੀਸੀਏ ਨੂੰ ਜੇਕਰ ਲੋੜ ਪਵੇ ਤਾਂ ਵੀਐਸਆਰ ਦੇ ਪੂਰੇ ਜਹਾਜ਼ਾਂ ਦੇ ਸੰਚਾਲਨ ਨੂੰ ਪੂਰੀ ਤਰ੍ਹਾਂ ਮੁਅੱਤਲ ਕਰਨ ‘ਤੇ ਵੀ ਵਿਚਾਰ ਕਰਨਾ ਚਾਹੀਦਾ ਹੈ।”
ਇੱਕ ਵੱਖਰੀ ਪੋਸਟ ਵਿੱਚ ਪਵਾਰ ਨੇ ਇੰਸਟਾਗ੍ਰਾਮ ‘ਤੇ ਇੱਕ ਵੀਡੀਓ ਵੀ ਸਾਂਝਾ ਕੀਤਾ ਜਿਸ ਵਿੱਚ ਉਡਾਣ ਦੌਰਾਨ ਲਾਪਰਵਾਹੀ ਦਾ ਦੋਸ਼ ਲਗਾਇਆ ਗਿਆ ਸੀ ਅਤੇ ਤੁਰੰਤ ਕਾਰਵਾਈ ਦੀ ਮੰਗ ਕੀਤੀ ਗਈ ਸੀ। ਉਨ੍ਹਾਂ ਨੇ ਪੋਸਟ ਵਿੱਚ ਅੱਗੇ ਲਿਖਿਆ, ‘‘ਇਸ ਵੀਡੀਓ ਵਿੱਚ, ਵੀਐਸਆਰ ਦੇ ਮਾਲਕ ਰੋਹਿਤ ਸਿੰਘ ਉਡਾਣ ਦੌਰਾਨ ਮੁੱਖ ਪਾਇਲਟ ਦੀ ਸੀਟ ‘ਤੇ ਸੁੱਤੇ ਹੋਏ ਦਿਖਾਈ ਦੇ ਰਹੇ ਹਨ। ਹਵਾ ਵਿੱਚ ਹੁੰਦਿਆਂ ਅਜਿਹੀ ਲਾਪਰਵਾਹੀ ਨਾਕਾਬਿਲ-ਏ-ਬਰਦਾਸ਼ਤ ਹੈ। ਇਹ ਬੇਹੱਦ ਗੰਭੀਰ ਅਤੇ ਹੈਰਾਨ ਕਰਨ ਵਾਲਾ ਹੈ। ਮੈਂ ਪੁਰਜ਼ੋਰ ਮੰਗ ਕਰਦਾ ਹਾਂ ਕਿ ਡੀਜੀਸੀਏ ਇਸ ਮਾਮਲੇ ਵਿੱਚ ਤੁਰੰਤ ਅਤੇ ਸਖ਼ਤ ਕਾਰਵਾਈ ਕਰੇ। ਜਦੋਂ ਤੱਕ ਮੁਕੰਮਲ ਜਾਂਚ ਨਹੀਂ ਹੋ ਜਾਂਦੀ, ਵੀਐਸਆਰ ਦੇ ਸਾਰੇ ਜਹਾਜ਼ਾਂ ਨੂੰ ਤੁਰੰਤ ਗਰਾਊਂਡ ਕੀਤਾ ਜਾਣਾ ਚਾਹੀਦਾ ਹੈ, ਅਤੇ ਰੋਹਿਤ ਸਿੰਘ ਨੂੰ ਤੁਰੰਤ ਗ੍ਰਿਫਤਾਰ ਕਰਕੇ ਸਖ਼ਤ ਕਾਨੂੰਨੀ ਕਾਰਵਾਈ ਕੀਤੀ ਜਾਣੀ ਚਾਹੀਦੀ ਹੈ। ਇਹ ਇੱਕ ਪੁੱਤਰ ਦੀ ਦਿਲੀ ਪੁਕਾਰ ਹੈ ਮੇਰੇ ਪਿਤਾ ਲਈ ਅਤੇ ਹਰ ਯਾਤਰੀ ਦੀ ਸੁਰੱਖਿਆ ਲਈ।’’
