ਜਲੰਧਰ (ਮਨੀਸ਼ ਰਿਹਾਨ) : ਏਸ਼ੀਅਨ ਚੈਂਪੀਅਨਜ਼ ਟਰਾਫੀ ਲਈ ਪੂਰੀ ਦੁਨੀਆ ਜਲੰਧਰ ਪਹੁੰਚ ਰਹੀ ਹੈ। ਜਪਾਨ, ਮਲੇਸ਼ੀਆ, ਚੀਨ, ਬੰਗਲਾਦੇਸ਼, ਕੋਰੀਆ ਅਤੇ ਹਰਮਨਪ੍ਰੀਤ ਸਿੰਘ ਦੀ ਏਸ਼ੀਆਈ ਖੇਡਾਂ ਦੀ ਸੋਨ ਤਗ਼ਮਾ ਜੇਤੂ ਭਾਰਤੀ ਟੀਮ ਬਰਲਟਨ ਪਾਰਕ ਦੇ ਇਤਿਹਾਸਕ ਸੁਰਜੀਤ ਸਿੰਘ ਹਾਕੀ ਸਟੇਡੀਅਮ ਵਿੱਚ ਇਕੱਠੀ ਹੋ ਰਹੀ ਹੈ। ਪੰਜਾਬੀ ਵੀ ਇਸ ਉਤਸ਼ਾਹ ਦਾ ਜਵਾਬ ਭੰਗੜੇ ਅਤੇ ਹਵਾ ਵਿੱਚ ਚੁੱਕੀਆਂ ਹਾਕੀਆਂ ਨਾਲ ਦੇ ਰਹੇ ਹਨ। ਇਸ ਮਾਹੌਲ ਵਿੱਚ ਹਰ ਕੋਈ ਜੋਸ਼ ਮਹਿਸੂਸ ਕਰ ਸਕਦਾ ਹੈ। ਜਪਾਨ ਦੇ ਹੈੱਡ ਕੋਚ ਫੂਜੀਮੋਟੋ ਇੱਪੇਈ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਇਹ ਬਹੁਤ ਪਸੰਦ ਆ ਰਿਹਾ ਹੈ ਅਤੇ ਉਹ ਦੋਸਤਾਂ ਤੋਂ ਸਿੱਖੇ ਪੰਜਾਬੀ ਸ਼ਬਦਾਂ ਜਿਵੇਂ “ਕਿੱਦਾਂ, ਠੀਕ ਆ?” ਦੀ ਵਰਤੋਂ ਕਰ ਰਹੇ ਹਨ। ਬੰਗਲਾਦੇਸ਼ ਦੇ ਕਪਤਾਨ ਇਸਲਾਮ ਅਸ਼ਰਫੁਲ ਨੇ ਕਿਹਾ, “ਸਵਾਗਤ ਬਹੁਤ ਵਧੀਆ ਹੈ ਅਤੇ ਖਾਣਾ ਵੀ ਬਹੁਤ ਵਧੀਆ ਹੈ।” ਮਲੇਸ਼ੀਆ ਦੇ ਕਪਤਾਨ ਮਰਹਾਨ ਜਲੀਲ ਨੇ ਕਿਹਾ ਕਿ ਪੰਜਾਬ ਵਿੱਚ ਉਨ੍ਹਾਂ ਦਾ ਪਹਿਲਾ ਗੇੜਾ ਹੈ ਅਤੇ ਉਨ੍ਹਾਂ ਨੂੰ ਸਟੇਡੀਅਮ ਬਹੁਤ ਪਸੰਦ ਆਇਆ। ਭਾਰਤੀ ਕਪਤਾਨ ਹਰਮਨਪ੍ਰੀਤ ਸਿੰਘ ਲਈ ਇਹ ਟੂਰਨਾਮੈਂਟ ਇੱਕ ਖ਼ਾਸ ਪਲ ਲੈ ਕੇ ਆਇਆ ਹੈ, ਕਿਉਂਕਿ ਪਹਿਲੀ ਵਾਰ ਉਨ੍ਹਾਂ ਦੇ ਪਿਤਾ ਅਤੇ ਧੀ ਉਨ੍ਹਾਂ ਨੂੰ ਲਾਈਵ ਖੇਡਦਿਆਂ ਦੇਖਣਗੇ। ਹਰਮਨਪ੍ਰੀਤ ਨੇ ਦੱਸਿਆ ਕਿ ਇਸੇ ਬਰਲਟਨ ਪਾਰਕ ਸਟੇਡੀਅਮ ਤੋਂ ਉਨ੍ਹਾਂ ਦੀ ਸ਼ੁਰੂਆਤ ਹੋਈ ਸੀ, ਜਿੱਥੇ ਉਹ ਬਚਪਨ ’ਚ ਰੋਜ਼ਾਨਾ ਪਾਣੀ ਦੀ ਬੋਤਲ ਲੈ ਕੇ ਅਭਿਆਸ ਕਰਨ ਆਉਂਦੇ ਸਨ।ਸ਼ਹਿਰ ਵਿੱਚ ਛੇ ਟੀਮਾਂ ਦੇ ਕਪਤਾਨਾਂ ਦੇ ਹੋਰਡਿੰਗਜ਼ ਲਗਾਏ ਗਏ ਹਨ। ਰੋਡ ਡਿਵਾਈਡਰਾਂ ਅਤੇ ਚੌਕਾਂ ਨੂੰ ਤਿਰੰਗੇ ਦੀਆਂ ਲੜੀਆਂ ਅਤੇ ਲਾਈਟਾਂ ਨਾਲ ਸਜਾਇਆ ਗਿਆ ਹੈ। ਜਲੰਧਰ ਪਹਿਲੀ ਵਾਰ ਇਸ ਟੂਰਨਾਮੈਂਟ ਦੀ ਮੇਜ਼ਬਾਨੀ ਕਰ ਰਿਹਾ ਹੈ। 16 ਕਰੋੜ ਰੁਪਏ ਤੋਂ ਵੱਧ ਦੀ ਲਾਗਤ ਨਾਲ ਨਵੀਨੀਕਰਨ ਕੀਤੇ ਸਟੇਡੀਅਮ ਵਿੱਚ ਸਾਰੀਆਂ 6 ਟੀਮਾਂ ਦੇ ਝੰਡੇ ਲਗਾਏ ਗਏ ਹਨ। ਮੈਚਾਂ ਵਿੱਚ ਅਜੇ ਦੋ ਦਿਨ ਬਾਕੀ ਹਨ, ਪਰ ਖੇਡ ਪ੍ਰੇਮੀ ਖਿਡਾਰੀਆਂ ਦੀ ਇੱਕ ਝਲਕ ਪਾਉਣ ਲਈ ਪਹੁੰਚ ਰਹੇ ਹਨ। ਚੀਨੀ ਖਿਡਾਰੀਆਂ ਨੂੰ ਅਭਿਆਸ ਕਰਦਿਆਂ ਦੇਖ ਕੇ ਨੌਜਵਾਨ ਹਾਕੀ ਖਿਡਾਰੀ ਇੱਕ-ਦੂਜੇ ਤੋਂ ਪੁੱਛਦੇ ਸੁਣੇ ਗਏ, “ਇਨ੍ਹਾਂ ਨੂੰ ਪੰਜਾਬੀ ਆਉਂਦੀ ਹੋਏਗੀ?” ਹਾਲਾਂਕਿ, ਸਭ ਜਾਣਦੇ ਹਨ ਕਿ ਮੈਚ ਸ਼ੁਰੂ ਹੋਣ ’ਤੇ ਸਿਰਫ਼ ਹਾਕੀ ਦੀ ਭਾਸ਼ਾ ਹੀ ਬੋਲੇਗੀ।
Asian Hockey stars: ‘ਕਿੱਦਾਂ, ਠੀਕ ਆ?’; ਪੰਜਾਬ ’ਚ ਏਸ਼ੀਆਈ ਹਾਕੀ ਸਿਤਾਰਿਆਂ ਦਾ ਸ਼ਾਨਦਾਰ ਸਵਾਗਤ
