ਮਿੱਠਾਪੁਰ (ਜਲੰਧਰ) (ਮਨੀਸ਼ ਰਿਹਾਨ) : ਭਾਰਤੀ ਮਹਿਲਾ ਹਾਕੀ ਟੀਮ ਵੱਲੋਂ ਏਸ਼ਿਆਈ ਖੇਡਾਂ ਵਿੱਚ ਸੋਨੇ ਦਾ ਤਗਮਾ ਜਿੱਤਣ ਮਗਰੋਂ ਮਿੱਠਾਪੁਰ ਵਿੱਚ ਇਸ ਵਾਰ ਖੁਸ਼ੀ ਕੁਝ ਜ਼ਿਆਦਾ ਹੀ ਹੈ। ਸਾਬਕਾ ਭਾਰਤੀ ਕਪਤਾਨ ਅਤੇ ਸਭ ਤੋਂ ਵੱਧ ਕੌਮਾਂਤਰੀ ਮੈਚ ਖੇਡਣ ਵਾਲੇ ਮਨਪ੍ਰੀਤ ਸਿੰਘ ਨੇ ਜਿੱਤ ਮਗਰੋਂ ਆਪਣੀ ਮਾਂ ਮਨਜੀਤ ਕੌਰ ਨੂੰ ਫੋਨ ਕਰਕੇ ਕਿਹਾ, ‘‘ਮੰਮੀ ਮੈਚ ਦੇਖਦੇ ਹੋ? ਬੱਲੀ (ਬਲਜੀਤ) ਹੁਰੀਂ ਜਿੱਤ ਗਏ।’’ ਮਨਜੀਤ ਕੌਰ ਨੇ ਕਿਹਾ, ‘‘ਮੁੰਡਿਆਂ ਨਾਲੋਂ ਸਾਨੂੰ ਇਸ ਵਾਰੀ ਕੁੜੀਆਂ ਦਾ ਜ਼ਿਆਦਾ ਚਾਅ ਹੈ। ਮੁੰਡੇ ਕਈ ਵਾਰ ਤਗਮੇ ਜਿੱਤ ਚੁੱਕੇ ਹਨ ਪਰ ਕੁੜੀਆਂ ਦਾ ਜਿੱਤਣਾ ਵੀ ਬਹੁਤ ਜ਼ਰੂਰੀ ਹੈ। ਸਾਡੀਆਂ ਬੱਚੀਆਂ, ਧੀਆਂ ਸੋਨੇ ਦਾ ਤਗਮਾ ਲੈ ਕੇ ਘਰ ਆਈਆਂ ਹਨ। ਸਾਡੀ ਛਾਤੀ ਮਾਣ ਨਾਲ ਚੌੜੀ ਹੋ ਜਾਵੇਗੀ।’’
44 ਸਾਲਾਂ ਮਗਰੋਂ ਮਹਿਲਾ ਟੀਮ ਨੂੰ ਸੋਨ ਤਗਮਾ
ਹਾਕੀ ਓਲੰਪੀਅਨ ਅਤੇ ਮਨਦੀਪ ਸਿੰਘ ਦੀ ਪਤਨੀ ਉਦਿਤਾ ਦੂਹਨ ਨੇ ਕਿਹਾ ਕਿ ਮਿੱਠਾਪੁਰ ਵਿੱਚ ਇਸ ਵਾਰ ਜਸ਼ਨ ਦੋਹਰੇ ਹਨ। ਮਨਦੀਪ ਨੇ 300 ਕੌਮਾਂਤਰੀ ਮੈਚ ਖੇਡੇ ਜਦਕਿ ਮਨਪ੍ਰੀਤ ਭਾਰਤ ਵੱਲੋਂ ਸਭ ਤੋਂ ਵੱਧ ਮੈਚ ਖੇਡਣ ਵਾਲਾ ਖਿਡਾਰੀ ਬਣਿਆ। ਉਨ੍ਹਾਂ ਕਿਹਾ ਕਿ 44 ਸਾਲਾਂ ਮਗਰੋਂ ਮਹਿਲਾ ਟੀਮ ਦਾ ਏਸ਼ਿਆਈ ਖੇਡਾਂ ਵਿੱਚ ਸੋਨ ਤਗਮਾ ਜਿੱਤਣਾ ਲੰਬੇ ਸਮੇਂ ਤੋਂ ਦੇਖਿਆ ਸੁਪਨਾ ਸੀ। ਪੁਰਸ਼ ਅਤੇ ਮਹਿਲਾ ਦੋਵੇਂ ਟੀਮਾਂ ਨੇ 2028 ਲਾਸ ਏਂਜਲਸ ਓਲੰਪਿਕ ਲਈ ਵੀ ਕੁਆਲੀਫਾਈ ਕਰ ਲਿਆ ਹੈ।
ਮਿੱਠਾਪੁਰ ਦੇ ਲੋਕਾਂ ਲਈ ਪੁਰਸ਼ ਅਤੇ ਮਹਿਲਾ ਟੀਮਾਂ ਦਾ ਇਕੱਠਿਆਂ ਸੋਨ ਤਗਮਾ ਜਿੱਤਣਾ ਸਿਰਫ਼ ਇਤਫ਼ਾਕ ਨਹੀਂ। ਪਿੰਡ ਵਿੱਚ ਮਹਿਲਾ ਹਾਕੀ ਨੂੰ ਮੈਦਾਨ ਤੱਕ ਲਿਆਉਣ ਦੀ ਇੱਕ ਨਵੀਂ ਕੋਸ਼ਿਸ਼ ਵੀ ਸ਼ੁਰੂ ਹੋ ਗਈ ਹੈ। ਮਨਦੀਪ ਦੀ ਪਤਨੀ ਉਦਿਤਾ ਦੂਹਨ ਹੁਣ ਮਿੱਠਾਪੁਰ ਦੇ ਬੱਚਿਆਂ ਨੂੰ ਸਵੇਰੇ ਅਤੇ ਸ਼ਾਮ ਹਾਕੀ ਦੀ ਕੋਚਿੰਗ ਦੇ ਰਹੀ ਹੈ।
ਪਰਗਟ ਸਿੰਘ ਦੇ ਦੌਰ ਤੋਂ ਤਿਆਰ ਹੋਈ ਪੀੜ੍ਹੀ
ਮਨਪ੍ਰੀਤ ਸਿੰਘ ਅਤੇ ਬਲਜੀਤ ਕੌਰ (ਬੱਲੀ) ਪੁਰਾਣੇ ਦੋਸਤ ਅਤੇ ਬੈਚਮੇਟ ਹਨ। ਦੋਵਾਂ ਨੇ ਕਈ ਸਾਲ ਇਕੱਠਿਆਂ ਹਾਕੀ ਖੇਡੀ। 2016 ਵਿੱਚ ਲਖਨਊ ਜੂਨੀਅਰ ਵਿਸ਼ਵ ਕੱਪ ਜਿੱਤਣ ਵਾਲੀ ਟੀਮ ਨਾਲ ਜੁੜੀ ਇਸ ਪੀੜ੍ਹੀ ਨੂੰ ਮਿੱਠਾਪੁਰ ਦੇ ਲੋਕ ਅੱਜ ਦੇ ਹਾਕੀ ਸਿਤਾਰਿਆਂ ਦੀ ਨੀਂਹ ਮੰਨਦੇ ਹਨ। ਉਸ ਸਮੇਂ ਪਰਗਟ ਸਿੰਘ ਪੰਜਾਬ ਦੇ ਖੇਡ ਡਾਇਰੈਕਟਰ ਸਨ।
ਕੋਚ ਬਲਵਿੰਦਰ ਸਿੰਘ ਨੇ ਕਿਹਾ ਕਿ ਪਰਗਟ ਸਿੰਘ ਨੇ ਮਨਪ੍ਰੀਤ, ਮਨਦੀਪ ਅਤੇ ਹੋਰਨਾਂ ਨੂੰ ਪ੍ਰੇਰਿਤ ਕੀਤਾ ਅਤੇ ਹੁਣ ਇਹ ਖਿਡਾਰੀ ਅਗਲੀ ਪੀੜ੍ਹੀ ਨੂੰ ਪ੍ਰੇਰਿਤ ਕਰ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਮਿੱਠਾਪੁਰ ਦੇ 11 ਖਿਡਾਰੀ ਇਸ ਵੇਲੇ ਵੱਖ-ਵੱਖ ਅਕੈਡਮੀਆਂ ਵਿੱਚ ਹਨ। ਹੁਣ ਪਿੰਡ ਵਿੱਚ ਕੁੜੀਆਂ ਨੂੰ ਵੀ ਹਾਕੀ ਨਾਲ ਜੋੜਨ ਦੀ ਤਿਆਰੀ ਕੀਤੀ ਜਾ ਰਹੀ ਹੈ। ਇਸੇ ਕਰਕੇ ਮਿੱਠਾਪੁਰ ਵਿੱਚ ਇਸ ਸਾਲ ਦੋਹਰੀ ਹਾਕੀ ਜਿੱਤ ਦਾ ਜਸ਼ਨ ਹੋਰ ਵੀ ਖਾਸ ਹੈ।
