ਚੰਡੀਗਡ਼੍ਹ : ਮੁਹਾਲੀ ਜ਼ਿਲ੍ਹੇ ਵਿੱਚ ਸਰਕਾਰੀ ਵੈਟਰਨਰੀ ਹਸਪਤਾਲ ਅਤੇ ਡਿਸਪੈਂਸਰੀਆਂ ਬੁਰੀ ਤਰ੍ਹਾਂ ਅਣਗੌਲੇ ਪਏ ਹਨ। ਵਿਆਪਕ ਅਣਦੇਖੀ ਨੇ ਜ਼ਿਲ੍ਹੇ ਭਰ ਦੀਆਂ ਸਰਕਾਰੀ ਵੈਟਰਨਰੀ ਸੰਸਥਾਵਾਂ ਨੂੰ ਖੋਖਲਾ ਕਰ ਦਿੱਤਾ ਹੈ। ਟ੍ਰਿਬਿਊਨ ਦੀ ਇੱਕ ਖਾਸ ਰਿਪੋਰਟ ਵਿੱਚ ਸਾਹਮਣੇ ਆਇਆ ਹੈ ਕਿ ਪਸ਼ੂਆਂ ਦੇ ਇਲਾਜ ਲਈ ਬਣਾਏ ਗਏ ਇਹ ਕੇਂਦਰ ਅੱਜ ਕਈ ਪਿੰਡਾਂ ਵਿੱਚ ਖੰਡਰ ਬਣ ਚੁੱਕੇ ਹਨ। ਪਿੰਡ ਵਾਸੀਆਂ ਦਾ ਕਹਿਣਾ ਹੈ ਕਿ ਇਹ ਹਸਪਤਾਲ ਸਿਰਫ਼ ਨਾਮ ਦੇ ਹੀ ਰਹਿ ਗਏ ਹਨ, ਜਿੱਥੇ ਕੋਈ ਸੇਵਾ ਨਹੀਂ ਮਿਲਦੀ। ਅਧਿਕਾਰਤ ਪੰਜਾਬ ਪਸ਼ੂ ਪਾਲਣ ਵੈੱਬਸਾਈਟ ‘ਤੇ ਉਪਲਬਧ ਅੰਕੜਿਆਂ ਅਨੁਸਾਰ ਸੂਬੇ ਵਿੱਚ 1,367 ਸਿਵਲ ਵੈਟਰਨਰੀ ਹਸਪਤਾਲ ਅਤੇ 1,489 ਡਿਸਪੈਂਸਰੀਆਂ ਹਨ।
ਵਿਆਪਕ ਅਣਦੇਖੀ, ਕਥਿਤ ਭ੍ਰਿਸ਼ਟਾਚਾਰ ਅਤੇ ਜਿਸ ਨੂੰ ਪਿੰਡ ਵਾਸੀ “ਭੂਤ ਵੈਟਰਨਰੀ ਸੇਵਾਵਾਂ” ਕਹਿੰਦੇ ਹਨ, ਨੇ ਮੁਹਾਲੀ ਜ਼ਿਲ੍ਹੇ ਭਰ ਦੀਆਂ ਸਰਕਾਰੀ ਵੈਟਰਨਰੀ ਸੰਸਥਾਵਾਂ ਨੂੰ ਖੋਖਲਾ ਕਰ ਦਿੱਤਾ ਹੈ, ਇਹ ਗੱਲ ਟ੍ਰਿਬਿਊਨ ਦੀ ਇੱਕ ਜਾਂਚ ਵਿੱਚ ਸਾਹਮਣੇ ਆਈ ਹੈ। ਸਰਕਾਰੀ ਵੈਟਰਨਰੀ ਡਿਸਪੈਂਸਰੀਆਂ ਅਤੇ ਹਸਪਤਾਲ, ਜੋ ਕਿ ਪਸ਼ੂਆਂ ਨੂੰ ਜ਼ਰੂਰੀ ਸਿਹਤ ਸੰਭਾਲ ਪ੍ਰਦਾਨ ਕਰਨ ਲਈ ਸਥਾਪਿਤ ਕੀਤੇ ਗਏ ਸਨ, ਕਈ ਪਿੰਡਾਂ ਵਿੱਚ ਲਾਵਾਰਿਸ ਇਮਾਰਤਾਂ ਬਣ ਕੇ ਰਹਿ ਗਏ ਹਨ। ਟ੍ਰਿਬਿਊਨ ਸਮੂਹ ਦੀ ਟੀਮ ਵੱਲੋਂ ਜ਼ਿਲ੍ਹੇ ਵਿੱਚ ਚਾਰ ਸਰਕਾਰੀ ਵੈਟਰਨਰੀ ਸਹੂਲਤਾਂ – ਮਿਰਜ਼ਾਪੁਰ, ਕਰੋਰਾਂ, ਪਰਛ ਅਤੇ ਕਸੌਲੀ ਦਾ ਦੌਰਾ ਕੀਤਾ ਗਿਆ। ਇਸ ਦੌਰਾਨ ਖਸਤਾਹਾਲ ਬੁਨਿਆਦੀ ਢਾਂਚੇ, ਗੈਰ-ਹਾਜ਼ਰ ਸਟਾਫ, ਖਾਲੀ ਦਵਾਈਆਂ ਦੀਆਂ ਅਲਮਾਰੀਆਂ ਅਤੇ ਅਮਲੀ ਤੌਰ ‘ਤੇ ਬੰਦ ਪਈਆਂ ਸਹੂਲਤਾਂ ਨਜ਼ਰ ਆਈਆਂ।
ਇਸ ਸਬੰਧੀ ਸੰਪਰਕ ਕੀਤੇ ਜਾਣ ’ਤੇ ਜ਼ਿਲ੍ਹਾ ਐਸ.ਏ.ਐਸ. ਨਗਰ ਦੇ ਪਸ਼ੂ ਪਾਲਣ ਵਿਭਾਗ ਦੇ ਡਿਪਟੀ ਡਾਇਰੈਕਟਰ ਡਾ. ਅਵਤਾਰ ਸਿੰਘ ਨੇ ਮੰਨਿਆ ਕਿ ਵੈਟਰਨਰੀ ਇੰਸਪੈਕਟਰ ਅਕਸਰ ਡਿਊਟੀ ਦੇ ਘੰਟਿਆਂ ਦੌਰਾਨ ਡਿਸਪੈਂਸਰੀਆਂ ਅਤੇ ਹਸਪਤਾਲਾਂ ਵਿੱਚ ਤਾਇਨਾਤ ਨਹੀਂ ਹੁੰਦੇ।
ਉਨ੍ਹਾਂ ਕਿਹਾ, ‘‘ਸਾਡੇ ਵੈਟ ਇੰਸਪੈਕਟਰ ਆਮ ਤੌਰ ‘ਤੇ ਡਿਸਪੈਂਸਰੀਆਂ ਜਾਂ ਹਸਪਤਾਲਾਂ ਵਿੱਚ ਨਹੀਂ ਹੁੰਦੇ; ਹਾਲਾਂਕਿ, ਉਹ ਕਾਲ ਆਉਣ ‘ਤੇ ਕੇਸਾਂ ‘ਤੇ ਜਾਂਦੇ ਹਨ।’’
ਜਦੋਂ ਕਈ ਡਿਸਪੈਂਸਰੀਆਂ ਦੀ ਮਾੜੀ ਹਾਲਤ ਅਤੇ ਉਨ੍ਹਾਂ ਦੇ ਵਿਗੜੇ ਹੋਏ ਬੁਨਿਆਦੀ ਢਾਂਚੇ ਬਾਰੇ ਪੁੱਛਿਆ ਗਿਆ, ਤਾਂ ਡਾ. ਅਵਤਾਰ ਨੇ ਬਹੁਤ ਘੱਟ ਸਪੱਸ਼ਟੀਕਰਨ ਦਿੱਤਾ। ਉਨ੍ਹਾਂ ਕਿਹਾ, “ਖਰਾਬ ਹੋ ਗਏ ਹੋਣਗੇ,” ਅਤੇ ਅੱਗੇ ਕਿਹਾ ਕਿ ਉਹ ਸੀਨੀਅਰ ਵੈਟਰਨਰੀ ਅਫਸਰਾਂ ਦੁਆਰਾ ਅਚਨਚੇਤ ਨਿਰੀਖਣ ਦੇ ਆਦੇਸ਼ ਦੇਣਗੇ।
ਉਨ੍ਹਾਂ ਨੇ ਅੱਗੇ ਕਿਹਾ, “ਸਾਨੂੰ ਪਹਿਲਾਂ ਕਦੇ ਕੋਈ ਸ਼ਿਕਾਇਤ ਨਹੀਂ ਮਿਲੀ। ਹੁਣ ਜਦੋਂ ਇਹ ਸਾਡੇ ਧਿਆਨ ਵਿੱਚ ਆਇਆ ਹੈ, ਅਸੀਂ ਜਾਂਚ ਕਰਵਾਵਾਂਗੇ।”
ਜਦੋਂ ਇਹ ਪੁੱਛਿਆ ਗਿਆ ਕਿ ਨਿਰਧਾਰਤ ਹਸਪਤਾਲਾਂ ਵਿੱਚ ਵੈਟਰਨਰੀ ਡਾਕਟਰ ਉਪਲਬਧ ਕਿਉਂ ਨਹੀਂ ਹਨ, ਤਾਂ ਡਾ. ਅਵਤਾਰ ਨੇ ਜਵਾਬ ਦਿੱਤਾ: “ਤੁਸੀਂ ਉਨ੍ਹਾਂ ਨੂੰ ਖੁਦ ਫ਼ੋਨ ਕਰਕੇ ਪੁੱਛ ਸਕਦੇ ਹੋ।”
ਪੰਜਾਬ ਦੇ ਪਸ਼ੂ ਪਾਲਣ ਨਿਰਦੇਸ਼ਕ ਨਾਲ ਸੰਪਰਕ ਕਰਨ ਦੀਆਂ ਵਾਰ-ਵਾਰ ਕੋਸ਼ਿਸ਼ਾਂ ਦੇ ਬਾਵਜੂਦ, ਇਸ ਰਿਪੋਰਟ ਦੇ ਫਾਈਲ ਹੋਣ ਤੱਕ ਕੋਈ ਜਵਾਬ ਨਹੀਂ ਮਿਲ ਸਕਿਆ।
ਦੌਰੇ ਦੌਰਾਨ ਮਿਰਜ਼ਾਪੁਰ ਵੈਟਰਨਰੀ ਡਿਸਪੈਂਸਰੀ, ਇੱਕ ਸਹੂਲਤ ਜੋ ਸਿਰਫ ਕਾਗਜ਼ਾਂ ‘ਤੇ ਮੌਜੂਦ ਹੈ ਇਹ ਡਿਸਪੈਂਸਰੀ ਲਾਵਾਰਿਸ ਹਾਲਤ ਵਿੱਚ ਪਾਈ ਗਈ। ਇਮਾਰਤ ਤੱਕ ਪਹੁੰਚਣਾ ਵੀ ਮੁਸ਼ਕਲ ਸੀ, ਕਿਉਂਕਿ ਬਿਲਡਿੰਗ ਵਿੱਚ ਚਿੱਕੜ ਭਰਿਆ ਹੋਇਆ ਸੀ।
ਡਿਸਪੈਂਸਰੀ ਪੂਰੀ ਤਰ੍ਹਾਂ ਨਾਲ ਗੈਰ-ਕਾਰਜਸ਼ੀਲ ਸੀ। ਕੋਈ ਵੀ ਸਟਾਫ ਮੈਂਬਰ ਮੌਜੂਦ ਨਹੀਂ ਸੀ, ਦਵਾਈਆਂ ਕਿਤੇ ਵੀ ਨਹੀਂ ਮਿਲੀਆਂ, ਟੁੱਟੇ ਬੈਂਚ, ਕੰਧਾਂ ‘ਤੇ ਕਾਈ ਜੰਮੀ ਇਮਾਰਤ ਲੰਬੇ ਸਮੇਂ ਤੋਂ ਅਣਦੇਖੀ ਦੇ ਸਪੱਸ਼ਟ ਸੰਕੇਤ ਦੇ ਰਹੀ ਸੀ।
ਮਿਰਜ਼ਾਪੁਰ ਪਿੰਡ ਦੇ ਸਾਬਕਾ ਪੰਚਾਇਤ ਮੈਂਬਰ ਸ਼ੰਕਰ ਦਾਸ ਨੇ ਦੋਸ਼ ਲਾਇਆ ਕਿ ਡਿਸਪੈਂਸਰੀ ਲਗਪਗ 15 ਸਾਲਾਂ ਤੋਂ ਲਾਵਾਰਸ ਪਈ ਹੈ।
ਉਨ੍ਹਾਂ ਦੋਸ਼ ਲਾਇਆ, “ਇਹ ਸਹੂਲਤ ਲਗਭਗ 15 ਸਾਲ ਪਹਿਲਾਂ ਚੱਲਦੀ ਹੁੰਦੀ ਸੀ, ਪਰ ਅੱਜ ਇਹ ਪੂਰੀ ਤਰ੍ਹਾਂ ਸੁੰਨਸਾਨ ਹੈ। ਕੋਈ ਜ਼ਰੂਰ ਤਨਖਾਹ ਲੈ ਰਿਹਾ ਹੋਵੇਗਾ ਜਦੋਂ ਕਿ ਪਿੰਡ ਵਾਸੀਆਂ ਅਤੇ ਸਰਕਾਰ ਦੋਵਾਂ ਨੂੰ ਧੋਖਾ ਦੇ ਰਿਹਾ ਹੈ। ਅਸੀਂ ਇੱਥੇ ਕਿਸੇ ਨੂੰ ਕੰਮ ਕਰਦੇ ਨਹੀਂ ਦੇਖਿਆ।’’
ਉਨ੍ਹਾਂ ਅੱਗੇ ਕਿਹਾ, “ਮੇਰੀ ਆਪਣੀ ਗਾਂ ਦੀ ਲੱਤ ਨੂੰ ਸਥਾਈ ਨੁਕਸਾਨ ਹੋਇਆ ਹੈ। ਕਿਉਂਕਿ ਪਿੰਡ ਵਿੱਚ ਕੋਈ ਵੈਟਰਨਰੀ ਮਦਦ ਨਹੀਂ ਹੈ, ਅਸੀਂ ਆਪਣੇ ਪਸ਼ੂਆਂ ਦੇ ਇਲਾਜ ਲਈ ਮਹਿੰਗੇ ਪ੍ਰਾਈਵੇਟ ਕਲੀਨਿਕਾਂ ‘ਤੇ ਨਿਰਭਰ ਰਹਿਣ ਲਈ ਮਜਬੂਰ ਹਾਂ।’’
ਕਰੋਰਾਂ ਵੈਟਰਨਰੀ ਹਸਪਤਾਲ
ਸਟਾਫ ਗੈਰ-ਹਾਜ਼ਰ, ਡਾਕਟਰ ‘ਪ੍ਰਾਈਵੇਟ ਪ੍ਰੈਕਟਿਸ ਚਲਾ ਰਿਹਾ ਹੈ’ ਕਰੋਰਾਂ (ਨਯਾਗਾਂਓ ਦੇ ਨੇੜੇ) ਵਿਖੇ ਸਿਵਲ ਵੈਟਰਨਰੀ ਹਸਪਤਾਲ ਦੀ ਇੱਕ ਚਿੰਤਾਜਨਕ ਤਸਵੀਰ ਸਾਹਮਣੇ ਆਈ। ਵੈਟਰਨਰੀ ਇੰਸਪੈਕਟਰ, ਜੋ ਆਮ ਤੌਰ ‘ਤੇ ਪਹਿਲੇ ਪੱਧਰ ਦੇ ਇਲਾਜ ਲਈ ਜ਼ਿੰਮੇਵਾਰ ਹੁੰਦਾ ਹੈ, ਟ੍ਰਿਬਿਊਨ ਦੇ ਦੌਰੇ ਦੌਰਾਨ ਗੈਰ-ਹਾਜ਼ਰ ਸੀ।
ਨਾਜ਼ੁਕ ਸਥਿਤੀਆਂ ਵਿੱਚ, ਪਸ਼ੂ ਪਾਲਕਾਂ ਨੂੰ ਸਟਾਫ ਨਾਲ ਸੰਪਰਕ ਕਰਨ ਅਤੇ ਉਨ੍ਹਾਂ ਦੇ ਆਉਣ ਦੀ ਉਡੀਕ ਕਰਨੀ ਪੈਂਦੀ ਹੈ, ਜਿਸ ਨਾਲ ਇਲਾਜ ਵਿੱਚ ਦੇਰੀ ਹੋਣੀ ਸੰਭਵ ਹੈ। ਦੁਕਾਨਦਾਰਾਂ ਅਤੇ ਵਸਨੀਕਾਂ ਨੇ ਟ੍ਰਿਬਿਊਨ ਨੂੰ ਦੱਸਿਆ ਕਿ ਵੈਟਰਨਰੀ ਇੰਸਪੈਕਟਰ ਆਮ ਤੌਰ ‘ਤੇ ਜਾਣ ਤੋਂ ਪਹਿਲਾਂ ਸਹੂਲਤ ‘ਤੇ ਸਿਰਫ ਇੱਕ ਜਾਂ ਦੋ ਘੰਟੇ ਹੀ ਆਉਂਦਾ ਹੈ।
ਇਲਾਜ ਵਾਲੀ ਮੇਜ਼ ਗੰਦੀ ਸੀ, ਜਿਸ ‘ਤੇ ਪਸ਼ੂਆਂ ਦੇ ਸਰੀਰਕ ਤਰਲ ਅਜੇ ਵੀ ਦਿਖਾਈ ਦੇ ਰਹੇ ਸਨ। ਹਰ ਪਾਸੇ ਗੰਦਗੀ, ਜਾਲੇ ਅਤੇ ਦਾਗ ਸਨ, ਅਤੇ ਅੰਦਰੋਂ ਬਦਬੂ ਆ ਰਹੀ ਸੀ। ਇੱਕ ਦੁਕਾਨਦਾਰ, ਜਿਸ ਨੇ ਆਪਣਾ ਨਾਮ ਗੁਪਤ ਰੱਖਣ ਦੀ ਬੇਨਤੀ ਕੀਤੀ, ਨੇ ਕਿਹਾ, “ਮੀਂਹ ਪੈਣ ‘ਤੇ ਪੂਰਾ ਹਸਪਤਾਲ ਪਾਣੀ ਨਾਲ ਭਰ ਜਾਂਦਾ ਹੈ।”
ਇੱਕ ਨਿਰਧਾਰਤ ਵੈਟਰਨਰੀ ਹਸਪਤਾਲ ਹੋਣ ਦੇ ਨਾਤੇ ਸਹੂਲਤ ਵਿੱਚ ਇੱਕ ਵੈਟਰਨਰੀ ਡਾਕਟਰ ਦਾ ਉਪਲਬਧ ਹੋਣਾ ਜ਼ਰੂਰੀ ਹੈ। ਦੁਕਾਨਦਾਰ ਨੇ ਦੋਸ਼ ਲਾਇਆ ਕਿ ਡਾਕਟਰ ਬਹੁਤ ਘੱਟ ਆਉਂਦਾ ਹੈ ਅਤੇ ਇਸ ਦੀ ਬਜਾਏ ਚੰਡੀਗੜ੍ਹ ਵਿੱਚ ਇੱਕ ਪ੍ਰਾਈਵੇਟ ਵੈਟਰਨਰੀ ਕਲੀਨਿਕ ਚਲਾਉਂਦਾ ਹੈ।
ਪੜਛ ਵੈਟਰਨਰੀ ਡਿਸਪੈਂਸਰੀ
ਪੜਛ ਵੈਟਰਨਰੀ ਡਿਸਪੈਂਸਰੀ ਦੀ ਤਸਵੀਰ ਸਭ ਤੋਂ ਪਰੇਸ਼ਾਨ ਕਰਨ ਵਾਲੀ ਸੀ। ਜ਼ਮੀਨ ਦੇ ਇੱਕ ਵੱਡੇ ਹਿੱਸੇ ‘ਤੇ ਬਣੀ, ਡਿਸਪੈਂਸਰੀ ਲਾਵਾਰਿਸ ਪਈ ਸੀ, ਜਿਸ ਵਿੱਚ ਕੋਈ ਕਰਮਚਾਰੀ, ਦੇਖਭਾਲ ਕਰਨ ਵਾਲਾ ਜਾਂ ਵੈਟਰਨਰੀ ਡਾਕਟਰ ਮੌਜੂਦ ਨਹੀਂ ਸੀ।
ਇੱਥੋਂ ਛੱਤ ਵਾਲੇ ਪੱਖੇ ਚੋਰੀ ਹੋ ਚੁੱਕੇ ਸਨ, ਛੱਤ ਦੇ ਕੁਝ ਹਿੱਸੇ ਡਿੱਗ ਚੁੱਕੇ ਸਨ। ਇਸ ਤੋਂ ਇਲਾਵਾ ਇਮਾਰਤ ਸਿਗਰਟ ਦੇ ਪੈਕੇਟਾਂ ਅਤੇ ਰੋਲਿੰਗ ਪੇਪਰ ਨਾਲ ਭਰੀ ਹੋਈ ਸੀ। ਅਲਮਾਰੀਆਂ ਵਿੱਚ ਵੱਡੀ ਮਾਤਰਾ ਵਿੱਚ ਸਰਿੰਜਾਂ ਸਨ ਜੋ ਅਸੁਰੱਖਿਅਤ ਛੱਡੀਆਂ ਗਈਆਂ ਸਨ।
ਪੰਜਾਬ ਦੀ ਨਸ਼ਿਆਂ ਵਿਰੁੱਧ ਲੰਬੇ ਸਮੇਂ ਤੋਂ ਚੱਲੀ ਆ ਰਹੀ ਲੜਾਈ ਨੂੰ ਦੇਖਦੇ ਹੋਏ, ਅਹਾਤੇ ਦੀ ਹਾਲਤ ਗੰਭੀਰ ਚਿੰਤਾਵਾਂ ਪੈਦਾ ਕਰ ਰਹੀ ਸੀ।
ਐਲੂਮੀਨੀਅਮ ਫੋਇਲ ਦੇ ਟੁਕੜੇ, ਜੋ ਅਕਸਰ ਨਸ਼ੀਲੇ ਪਦਾਰਥਾਂ ਦੇ ਸੇਵਨ ਨਾਲ ਜੁੜੇ ਹੁੰਦੇ ਹਨ, ਵਰਤੀਆਂ ਗਈਆਂ ਸਰਿੰਜਾਂ ਦੇ ਨਾਲ ਕੰਪਾਊਂਡ ਵਿੱਚ ਖਿੰਡੇ ਹੋਏ ਸਨ।
ਕਸੌਲੀ ਵੈਟਰਨਰੀ ਹਸਪਤਾਲ
ਕਾਰਜਸ਼ੀਲ ਪਰ ਦਵਾਈਆਂ ਦੀ ਕਮੀ ਨਾਲ ਜੂਝ ਰਿਹਾ ਕਸੌਲੀ ਪਿੰਡ ਦਾ ਸਿਵਲ ਵੈਟਰਨਰੀ ਹਸਪਤਾਲ ਚੱਲ ਰਿਹਾ ਸੀ, ਜਿਸ ਵਿੱਚ ਸਟਾਫ ਨਿਯਮਤ ਕੰਮਕਾਜੀ ਘੰਟਿਆਂ ਦੌਰਾਨ ਮੌਜੂਦ ਸੀ। ਹਾਲਾਂਕਿ, ਪਿੰਡ ਦੇ ਸਰਪੰਚ ਯੋਗਰਾਜ ਸਿੰਘ ਨੇ ਕਿਹਾ, “ਇਸ ਹਸਪਤਾਲ ਨੂੰ ਲੰਬੇ ਸਮੇਂ ਤੋਂ ਦਵਾਈਆਂ ਦੀ ਕਮੀ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।”
ਉਨ੍ਹਾਂ ਅੱਗੇ ਕਿਹਾ, “ਬੁਨਿਆਦੀ ਡਾਕਟਰੀ ਬੁਨਿਆਦੀ ਢਾਂਚੇ ਦੀ ਘਾਟ ਕਾਰਨ ਪਸ਼ੂ ਪਾਲਕ ਸੰਘਰਸ਼ ਕਰ ਰਹੇ ਹਨ, ਹਾਲਾਂਕਿ ਹਸਪਤਾਲ ਚੱਲ ਰਿਹਾ ਹੈ,” ਅਤੇ ਅੱਗੇ ਕਿਹਾ, “ਇੱਥੇ ਸਿਰਫ ਮਾਮੂਲੀ ਸਮੱਸਿਆਵਾਂ ਜਿਵੇਂ ਕਿ ਪਿੱਸੂ ਅਤੇ ਟਿੱਕਾਂ ਦਾ ਇਲਾਜ ਕੀਤਾ ਜਾਂਦਾ ਹੈ। ਖੇਤਰ ਵਿੱਚ ਪਸ਼ੂਆਂ ਦੀ ਦੇਖਭਾਲ ਲਈ ਕੋਈ ਹੋਰ ਵੱਡੀ ਸਹੂਲਤ ਨਹੀਂ ਹੈ।”
ਪਸ਼ੂ ਭਲਾਈ ਗਰੁੱਪ ਵੱਲੋਂ ਜਾਂਚ ਦੀ ਮੰਗ
ਪਸ਼ੂ ਭਲਾਈ ਗਰੁੱਪ ਨੇ ਆਡਿਟ ਦੀ ਮੰਗ ਕੀਤੀ ਮੈਗਾਫੌਨਾ ਵੈਲਫੇਅਰ ਫਾਊਂਡੇਸ਼ਨ ਦੇ ਅਨੁਸਾਰ, ਮੁਹਾਲੀ ਵਿੱਚ ਬੰਦ ਪਈਆਂ ਵੈਟਰਨਰੀ ਸਹੂਲਤਾਂ ਇੱਕ ਪ੍ਰਣਾਲੀਗਤ ਅਸਫਲਤਾ ਨੂੰ ਦਰਸਾਉਂਦੀਆਂ ਹਨ।
ਸਹਿ-ਸੰਸਥਾਪਕ ਉਦਿਤ ਭਾਟੀਆ ਨੇ ਕਿਹਾ ਕਿ ਲਾਵਾਰਿਸ ਡਿਸਪੈਂਸਰੀਆਂ ਦਾ ਮਤਲਬ ਹੈ ਕਿ ਪਸ਼ੂਆਂ ਦਾ ਇਲਾਜ ਨਹੀਂ ਹੁੰਦਾ, ਕਿਸਾਨ ਪ੍ਰਾਈਵੇਟ ਕਲੀਨਿਕਾਂ ਵਿੱਚ ਕਰਜ਼ੇ ਵਿੱਚ ਡੁੱਬ ਜਾਂਦੇ ਹਨ ਅਤੇ ਜਨਤਕ ਪੈਸਾ ਜਵਾਬਦੇਹੀ ਤੋਂ ਬਿਨਾਂ ਗਾਇਬ ਹੋ ਜਾਂਦਾ ਹੈ। ਫਾਊਂਡੇਸ਼ਨ ਨੇ ਜ਼ਿਲ੍ਹੇ ਦੀਆਂ ਸਾਰੀਆਂ ਸਰਕਾਰੀ ਵੈਟਰਨਰੀ ਸੰਸਥਾਵਾਂ ਦੀ ਸੀਐਮਓ-ਅਗਵਾਈ ਵਾਲੀ ਜਾਂਚ, ਦੋਸ਼ੀ ਪਾਏ ਗਏ ਅਧਿਕਾਰੀਆਂ ਵਿਰੁੱਧ ਅਪਰਾਧਿਕ ਕਾਰਵਾਈ ਅਤੇ ਦੁਰਵਰਤੋਂ ਕੀਤੇ ਗਏ ਫੰਡਾਂ ਦੀ ਵਸੂਲੀ ਦੀ ਮੰਗ ਕੀਤੀ ਹੈ।
ਇਸ ਦੇ ਨਾਲ ਹੀ, ਭਾਟੀਆ ਨੇ ਸਿਸਟਮ ਵਿੱਚ ਸੁਧਾਰ ਲਈ ਕੁਝ ਸੁਝਾਅ ਦਿੱਤੇ ਹਨ, ਜਿਵੇਂ ਕਿ ਇਨ੍ਹਾਂ ਇਮਾਰਤਾਂ ਨੂੰ ਖੂਨ ਦੇ ਨਮੂਨੇ ਇਕੱਤਰ ਕਰਨ ਵਾਲੇ ਕੇਂਦਰਾਂ ਅਤੇ ਕਮਿਊਨਿਟੀ ਕੁੱਤਿਆਂ ਦੀ ਨਸਬੰਦੀ ਲਈ ਵਰਤਿਆ ਜਾਵੇ। ਇਸ ਦੇ ਨਾਲ ਹੀ ਉਨ੍ਹਾਂ ਨੇ ਸੀਸੀਟੀਵੀ ਨਿਗਰਾਨੀ, ਸਟਾਫ ਲਈ ਬਾਇਓਮੈਟ੍ਰਿਕ ਹਾਜ਼ਰੀ ਅਤੇ ਨਿਯਮਤ ਤੌਰ ‘ਤੇ ਤੀਜੀ-ਧਿਰ (ਥਰਡ ਪਾਰਟੀ) ਰਾਹੀਂ ਆਡਿਟ ਕਰਵਾਉਣ ਦੀ ਵੀ ਅਪੀਲ ਕੀਤੀ ਹੈ।
