ਨਵੀਂ ਦਿੱਲੀ : ਕੇਂਦਰ ਸਰਕਾਰ ਨੇ ਆਫ-ਰੋਡ ਵਾਹਨਾਂ ਤੋਂ ਹੁੰਦੇ ਪ੍ਰਦੂਸ਼ਣ ਨੂੰ ਘਟਾਉਣ ਦੇ ਇਰਾਦੇ ਨਾਲ ਖੇਤੀਬਾੜੀ ਟਰੈਕਟਰਾਂ, ਹੋਰ ਖੇਤੀ ਉਪਕਰਨਾਂ ਜਿਵੇਂ ਪਾਵਰ ਟਿਲਰਾਂ, ਕੰਬਾਈਨ ਹਾਰਵੈਸਟਰਾਂ ਅਤੇ ਉਸਾਰੀ ਕਾਰਜਾਂ ਲਈ ਵਰਤੇ ਜਾਂਦੇ ਵਾਹਨਾਂ ਲਈ ਸਖ਼ਤ ਨਿਕਾਸੀ ਮਾਪਦੰਡ ਨੋਟੀਫਾਈ ਕੀਤੇ ਹਨ। ਟਰੈਕਟਰ ਨਿਰਮਾਤਾਵਾਂ ਅਤੇ ਉਸਾਰੀ ਉਪਕਰਨ ਕੰਪਨੀਆਂ ਨੂੰ ਨਵੇਂ ਮਾਪਦੰਡ ਪੂਰੇ ਕਰਨ ਲਈ ਇੰਜਣ ਤਕਨਾਲੋਜੀਆਂ ਨੂੰ ਅਪਗ੍ਰੇਡ ਕਰਨ ਦੀ ਲੋੜ ਪਏਗੀ। ਨਵੇਂ ਮਾਪਦੰਡ ਪਹਿਲੀ ਅਕਤੂਬਰ ਤੋਂ ਅਮਲ ਵਿੱਚ ਆਉਣਗੇ। ਟਰੈਕਟਰ ਤੇ ਭਾਰੀ ਮਸ਼ੀਨਰੀ ਦੇ ਖ਼ਰੀਦਦਾਰ ਇਸ ਤਰੀਕ ਮਗਰੋਂ ਨੁਕਸਾਨਦਾਇਕ ਨਿਕਾਸ ਨੂੰ ਘੱਟ ਕਰਨ ਤੇ ਈਂਧਣ ਕੁਸ਼ਲਤਾ ਵਿੱਚ ਸੁਧਾਰ ਲਈ ਡਿਜ਼ਾਈਨ ਕੀਤੇ ਗਏ ਉੱਨਤ ਨਿਕਾਸ ਕੰਟਰੋਲ ਪ੍ਰਣਾਲੀਆਂ ਨਾਲ ਲੈਸ ਉਪਕਰਨਾਂ ਦੀ ਉਮੀਦ ਕਰ ਸਕਦੇ ਹਨ। ਸਰਕਾਰ ਨੇ ਲਾਗੂ ਨਿਕਾਸੀ ਸਮਾਂ-ਸੀਮਾਵਾਂ ਤੋਂ ਪਹਿਲਾਂ ਬਣੇ ਵਾਹਨਾਂ ਲਈ ਨੌਂ ਮਹੀਨਿਆਂ ਦੀ ਰਜਿਸਟਰੇਸ਼ਨ ਵਿੰਡੋ ਪ੍ਰਦਾਨ ਕੀਤੀ ਹੈ, ਜਿਸ ਨਾਲ ਨਿਰਮਾਤਾਵਾਂ ਅਤੇ ਡੀਲਰਾਂ ਨੂੰ ਟਰਾਂਜ਼ਿਸ਼ਨ ਅਰਸੇ ਦੌਰਾਨ ਆਪਣਾ ਮੌਜੂਦਾ ਸਟਾਕ ਕੱਢਣ ਦਾ ਮੌਕਾ ਮਿਲੇਗਾ।
ਸੜਕ ਆਵਾਜਾਈ ਤੇ ਸ਼ਾਹਰਾਹ ਮੰਤਰਾਲੇ ਵੱਲੋਂ ਨਵੇਂ ਸੈਂਟਰਲ ਮੋਟਰ ਵਹੀਕਲਜ਼ (11ਵੀਂ ਸੋਧ) ਨੇਮ, 2026 ਮੋਟਰ ਵਹੀਕਲਜ਼ ਐਕਟ 1988 ਦੀ ਧਾਰਾ 110 ਤਹਿਤ ਨੋਟੀਫਾਈ ਕੀਤੇ ਗਏ ਹਨ। ਨੇਮਾਂ ਮੁਤਾਬਕ ਸਖ਼ਤ ਮਾਪਦੰਡ ਪਹਿਲੀ ਅਕਤੂਬਰ 2026 ਤੋਂ ਪੜਾਅਵਾਰ ਲਾਗੂ ਹੋਣਗੇ ਜਦੋਂਕਿ ਅਪਰੈਲ 2028 ਅਤੇ ਅਪਰੈਲ 2032 ਵਿੱਚ ਵਾਧੂ ਪੜਾਅ ਹੋਣਗੇ। ਇਹ ਸੋਧ ਖੇਤੀਬਾੜੀ ਮਸ਼ੀਨਰੀ ਲਈ ਨਿਕਾਸ ਮਾਪਦੰਡਾਂ ਨੂੰ ਟਰੈਕਟਰ ਨਿਕਾਸੀ ਨਾਰਮਜ਼ (ਟੀ ਆਰ ਈ ਐੱਮ) ਸਟੇਜ-5 ਅਤੇ ਉਸਾਰੀ ਉਪਕਰਨਾਂ ਲਈ ਨਿਰਮਾਣ ਉਪਕਰਨ ਵਾਹਨਾਂ ਸਟੇਜ-5 ਵਿੱਚ ਅਪਗ੍ਰੇਡ ਕਰਦੀ ਹੈ। ਇਹ ਮਾਪਦੰਡ ਕਾਰਬਨ ਮੋਨੋਆਕਸਾਈਡ (ਸੀ ਓ), ਹਾਈਡ੍ਰੋਕਾਰਬਨ (ਐੱਚ ਸੀ), ਨਾਈਟ੍ਰੋਜਨ ਆਕਸਾਈਡ (ਐੱਨ ਓ ਐਕਸ) ਅਤੇ ਕਣ ਪਦਾਰਥ (ਪੀ ਐੱਮ) ਲਈ ਕਾਫ਼ੀ ਘੱਟ ਸੀਮਾਵਾਂ ਨਿਰਧਾਰਤ ਕਰਦੇ ਹਨ। ਪਹਿਲੀ ਵਾਰ, ਅਲਟਰਾ-ਫਾਈਨ ਕਣ ਨਿਕਾਸ ਨੂੰ ਕੰਟਰੋਲ ਕਰਨ ਲਈ ਨਿਰਧਾਰਤ ਇੰਜਣ ਸ਼੍ਰੇਣੀਆਂ ਲਈ ਕਣ ਨੰਬਰ (ਪੀ ਐੱਨ) ਲਿਮਟ ਵੀ ਪੇਸ਼ ਕੀਤੀ ਗਈ ਹੈ। ਨਵਾਂ ਚੌਖਟਾ ਈਂਧਣ ਦੀ ਵਿਸ਼ਾਲ ਸ਼੍ਰੇਣੀ ਨੂੰ ਕਵਰ ਕਰਦਾ ਹੈ, ਜਿਸ ਵਿੱਚ ਸੀ ਐੱਨ ਜੀ, ਬਾਇਓ- ਸੀ ਐੱਨ ਜੀ, ਬਾਇਓਗੈਸ, ਐੱਲ ਐੱਨ ਜੀ, ਐੱਲ ਪੀ ਜੀ, ਹਾਈਡ੍ਰੋਜਨ ਦੀ ਬਹੁਤਾਤ ਵਾਲੀ ਸੀ ਐੱਨ ਜੀ (ਐੱਚ ਸੀ ਐੱਨ ਜੀ), ਡੀਜ਼ਲ, ਈਥਾਨੌਲ ਮਿਸ਼ਰਣ, ਫਲੈਕਸ-ਫਿਊਲ, ਬਾਇਓਡੀਜ਼ਲ ਮਿਸ਼ਰਣ, ਹਾਈਡ੍ਰੋਜਨ ਅਤੇ ਦੋਹਰਾ-ਫਿਊਲ ਇੰਜਣ ਸ਼ਾਮਲ ਹਨ।
