ਸਿਓਲ: ਉੱਤਰ ਕੋਰੀਆ ਦੇ ਨੇਤਾ ਕਿਮ ਜੋਂਗ ਉਨ ਨੇ ਉੱਚ ਤਾਕਤੀ ਠੋਸ ਈਂਧਨ ਇੰਜਣ ਦੀ ਅਜ਼ਮਾਇਸ਼ ਦਾ ਨਿਰੀਖਣ ਕੀਤਾ ਅਤੇ ਇਸ ਨੂੰ ਦੇਸ਼ ਦੀ ਰਣਨੀਤਕ ਫ਼ੌਜੀ ਸਮਰੱਥਾ ਵਧਾਉਣ ਲਈ ਵੱਡੀ ਪ੍ਰਾਪਤੀ ਵਜੋਂ ਸਲਾਹਿਆ। ਇਹ ਤਜਰਬਾ ਸੰਕੇਤ ਦਿੰਦਾ ਹੈ ਕਿ ਕਿਮ ਜੋਂਗ ਉਨ ਮਿਜ਼ਾਈਲਾਂ ਦੇ ਭੰਡਾਰ ਨੂੰ ਅਮਰੀਕੀ ਮੁੱਖ ਸਰਜ਼ਮੀਨ ਤੱਕ ਪਹੁੰਚਾਉਣ ਦੇ ਸਮਰੱਥ ਅਤੇ ਆਧੁਨਿਕ ਬਣਾਉਣ ਦਾ ਇਰਾਦਾ ਰੱਖਦੇ ਹਨ। ਕੋਰੀਅਨ ਸੈਂਟਰਲ ਨਿਊਜ਼ ਏਜੰਸੀ ਦੀ ਇਹ ਰਿਪੋਰਟ ਕਿਮ ਜੋਂਗ ਉਨ ਵੱਲੋਂ ਉੱਤਰੀ ਕੋਰੀਆ ਦੀ ਸੰਸਦ ਵਿੱਚ ਦਿੱਤੇ ਭਾਸ਼ਣ ਤੋਂ ਕੁਝ ਦਿਨ ਬਾਅਦ ਆਈ ਹੈ, ਜਿਸ ਵਿੱਚ ਉਨ੍ਹਾਂ ਆਪਣੇ ਦੇਸ਼ ਦੀ ਪਰਮਾਣੂ ਸ਼ਕਤੀ ਸਥਿਤੀ ਨੂੰ ਹੋਰ ਮਜ਼ਬੂਤ ਬਣਾਉਣ ਦਾ ਅਹਿਦ ਲਿਆ ਸੀ। ਕਿਮ ਜੋਂਗ ਉਨ ਨੇ ਮੱਧ ਪੂਰਬ ਵਿੱਚ ਜੰਗ ਦੇ ਪ੍ਰਸੰਗ ’ਚ ਅਮਰੀਕਾ ’ਤੇ ਆਲਮੀ ‘ਸਰਕਾਰੀ ਅਤਿਵਾਦੀ ਅਤੇ ਹਮਲਾਵਰ’ ਹੋਣ ਦਾ ਦੋਸ਼ ਲਾਇਆ ਸੀ।
ਨਿਊਜ਼ ਏਜੰਸੀ ਮੁਤਾਬਕ ਕਿਮ ਜੋਂਗ ਉਨ ਨੇ ਮਿਸ਼ਰਤ ਕਾਰਬਨ ਫਾਈਬਰ ਸਮੱਗਰੀ ਨਾਲ ਬਣਾਏ ਗਏ ਨਵੇਂ ਉੱਨਤ ਇੰਜਣ ਦਾ ਜ਼ਮੀਨ ’ਤੇ ਕੀਤਾ ਗਿਆ ਪ੍ਰੀਖਣ ਦੇਖਿਆ। ਇੰਜਣ ਦੀ ਵੱਧ ਤੋਂ ਵੱਧ ਸਮਰੱਥਾ 2,500 ਕਿਲੋਟਨ ਹੈ, ਜੋ ਸਤੰਬਰ ਵਿੱਚ ਕੀਤੇ ਅਜਿਹੇ ਤਜਰਬੇ ਦੇ 1,971 ਕਿਲੋਟਨ ਤੋਂ ਕਿਤੇ ਵੱਧ ਹੈ। ਨਿਰੀਖਕਾਂ ਮੁਤਾਬਕ ਇੰਜਣ ਦੀ ਤਾਕਤ ਵਧਾਉਣ ਦਾ ਇਹ ਯਤਨ ਸੰਭਾਵੀ ਤੌਰ ’ਤੇ ਅਮਰੀਕੀ ਰੱਖਿਆ ਪ੍ਰਣਾਲੀ ਨੂੰ ਮਾਤ ਦੇਣ ਲਈ ਮਿਜ਼ਾਈਲ ’ਤੇ ਕਈ ਵਾਰਹੈੱਡ ਲਾਉਣ ਦੀਆਂ ਕੋਸ਼ਿਸ਼ਾਂ ਨਾਲ ਜੁੜਿਆ ਹੋਇਆ ਹੈ। ਨਿਊਜ਼ ਏਜੰਸੀ ਨੇ ਇਹ ਨਹੀਂ ਦੱਸਿਆ ਕਿ ਇਹ ਅਜ਼ਮਾਇਸ਼ ਅਸਲ ਵਿੱਚ ਕਦੋਂ ਜਾਂ ਕਿੱਥੇ ਹੋਈ।
