ਲੌਸ ਏਂਜਲਸ: ਹਾਲੀਵੁੱਡ ਦੇ ਸਭ ਤੋਂ ਵੱਕਾਰੀ 98ਵੇਂ ਅਕੈਡਮੀ ਐਵਾਰਡਸ ਵਿੱਚ ਨਿਰਦੇਸ਼ਕ ਪਾਲ ਥਾਮਸ ਐਂਡਰਸਨ ਦੀ ਫ਼ਿਲਮ ‘ਵਨ ਬੈਟਲ ਆਫਟਰ ਅਨਦਰ’ (One Battle After Another) ਨੇ ‘ਸਰਵੋਤਮ ਫ਼ਿਲਮ’ ਦਾ ਖ਼ਿਤਾਬ ਜਿੱਤ ਕੇ ਇਤਿਹਾਸ ਰਚ ਦਿੱਤਾ ਹੈ। ਰਾਜਨੀਤਿਕ ਵਿਰੋਧ ਦੀ ਇੱਕ ਬਹੁ-ਪੀੜ੍ਹੀ ਅਮਰੀਕੀ ਗਾਥਾ ’ਤੇ ਆਧਾਰਿਤ ਇਸ ਕਾਮਿਕ ਫ਼ਿਲਮ ਨੇ ਐਂਡਰਸਨ ਨੂੰ ਦਹਾਕਿਆਂ ਦੇ ਇੰਤਜ਼ਾਰ ਤੋਂ ਬਾਅਦ ਉਨ੍ਹਾਂ ਦਾ ਪਹਿਲਾ ਆਸਕਰ ਦਿਵਾਇਆ ਹੈ।
ਐਤਵਾਰ ਰਾਤ ਹੋਏ ਇਸ ਸ਼ਾਨਦਾਰ ਸਮਾਗਮ ਵਿੱਚ ਮਾਈਕਲ ਬੀ. ਜਾਰਡਨ ਨੂੰ ‘ਸਰਵੋਤਮ ਅਦਾਕਾਰ’ ਦਾ ਐਵਾਰਡ ਮਿਲਿਆ, ਜਦੋਂਕਿ ਫ਼ਿਲਮ ‘ਸਿਨਰਜ਼’ (Sinners) ਲਈ ਆਟਮ ਡੂਰਾਲਡ ਅਰਕਾਪਾ ਨੇ ਆਸਕਰ ਇਤਿਹਾਸ ਵਿੱਚ ਸਰਵੋਤਮ ਸਿਨੇਮੈਟੋਗ੍ਰਾਫੀ ਦਾ ਐਵਾਰਡ ਜਿੱਤਣ ਵਾਲੀ ਪਹਿਲੀ ਮਹਿਲਾ ਬਣ ਕੇ ਨਵਾਂ ਕੀਰਤੀਮਾਨ ਸਥਾਪਿਤ ਕੀਤਾ ਹੈ। ਇਹ ਰਾਤ ‘ਵਾਰਨਰ ਬ੍ਰਦਰਜ਼’ (Warner Bros) ਸਟੂਡੀਓ ਲਈ ਜਸ਼ਨ ਅਤੇ ਭਾਵੁਕਤਾ ਦਾ ਸੁਮੇਲ ਰਹੀ, ਜਿਸ ਦੀਆਂ ਦੋ ਪ੍ਰਮੁੱਖ ਫ਼ਿਲਮਾਂ ‘ਵਨ ਬੈਟਲ ਆਫਟਰ ਅਨਦਰ’ ਅਤੇ ਰਾਇਨ ਕੂਗਲਰ ਦੀ ‘ਸਿਨਰਜ਼’ ਨੇ ਵੱਡੀ ਸਫਲਤਾ ਹਾਸਲ ਕੀਤੀ। ਜ਼ਿਕਰਯੋਗ ਹੈ ਕਿ ਇਹ ਜਿੱਤ ਅਜਿਹੇ ਸਮੇਂ ਆਈ ਹੈ ਜਦੋਂ ਕੁਝ ਹਫ਼ਤੇ ਪਹਿਲਾਂ ਹੀ ਇਸ ਇਤਿਹਾਸਕ ਸਟੂਡੀਓ ਨੂੰ ‘ਪੈਰਾਮਾਉਂਟ ਸਕਾਈਡਾਂਸ’ ਨੂੰ ਵੇਚਣ ਦਾ ਸਮਝੌਤਾ ਹੋਇਆ ਹੈ। ਹੌਲੀਵੁੱਡ ਵਿੱਚ ਆਰਟੀਫੀਸ਼ੀਅਲ ਇੰਟੈਲੀਜੈਂਸ (AI) ਦੇ ਵਧਦੇ ਪ੍ਰਭਾਵ ਅਤੇ ਸਟੂਡੀਓਜ਼ ਦੇ ਰਲੇਵੇਂ ਕਾਰਨ ਪੈਦਾ ਹੋਈ ਚਿੰਤਾ ਦੇ ਦੌਰ ਵਿੱਚ, ਇਨ੍ਹਾਂ ਵੱਡੇ ਬਜਟ ਦੀਆਂ ਮੌਲਿਕ ਫ਼ਿਲਮਾਂ ਦੀ ਜਿੱਤ ਨੇ ਉਦਯੋਗ ਵਿੱਚ ਇੱਕ ਨਵੀਂ ਉਮੀਦ ਜਗਾਈ ਹੈ।
