ਭੁਬਨੇਸ਼ਵਰ: ਇੱਕ 43 ਸਾਲਾ ਕਾਲਜ ਲੈਕਚਰਾਰ ਸਮੇਤ ਦੋ ਵਿਅਕਤੀਆਂ ਨੂੰ ਵੱਖ ਰਹਿ ਰਹੀ 37 ਸਾਲਾ ਪਤਨੀ ਅਤੇ ਉਸ ਦੇ ਇੱਕ ਪੁਰਸ਼ ਸਾਥੀ ਨੂੰ ਨਾਜਾਇਜ਼ ਸਬੰਧਾਂ ਦੇ ਸ਼ੱਕ ਕਾਰਨ ਸੜਕ ‘ਤੇ ਘੁੰਮਾਉਣ ਦੇ ਦੋਸ਼ ਵਿੱਚ ਗ੍ਰਿਫਤਾਰ ਕੀਤਾ ਗਿਆ ਹੈ।ਇੱਕ ਸੀਨੀਅਰ ਅਧਿਕਾਰੀ ਨੇ ਦੱਸਿਆ ਕਿ ਇਹ ਘਟਨਾ ਮੰਗਲਵਾਰ ਰਾਤ ਨੂੰ ਪੁਰੀ ਜ਼ਿਲ੍ਹੇ ਦੇ ਨਿਮਾਪਾੜਾ ਕਸਬੇ ਵਿੱਚ ਵਾਪਰੀ, ਜਦੋਂ ਮੁਲਜ਼ਮ ਲੈਕਚਰਾਰ ਆਪਣੇ ਦੋਸਤ ਨਾਲ ਉਸ ਦੀ ਪਤਨੀ ਦੇ ਘਰ ਦਾਖਲ ਹੋ ਗਿਆ, ਜੋ ਪਿਛਲੇ ਕੁਝ ਸਾਲਾਂ ਤੋਂ ਵੱਖ ਰਹਿ ਰਹੀ ਸੀ। ਲੈਕਚਰਾਰ ਨੇ ਕਥਿਤ ਤੌਰ ’ਤੇ ਉਸ ਨਾਲ ਕੁੱਟਮਾਰ ਕੀਤੀ।
ਲੈਕਚਰਾਰ ਨੇ ਦਾਅਵਾ ਕੀਤਾ ਕਿ ਉਸ ਦੀ ਪਤਨੀ ਦਾ ਕਿਸੇ ਹੋਰ ਵਿਅਕਤੀ ਨਾਲ ਸਬੰਧ ਸੀ। ਪੁਲਿਸ ਨੇ ਦੱਸਿਆ ਕਿ ਪਤਨੀ ਅਤੇ ਉਸ ਦੇ ਪੁਰਸ਼ ਸਾਥੀ ਦੋਵਾਂ ਨੇ ਇਸ ਦੋਸ਼ ਨੂੰ ਰੱਦ ਕਰ ਦਿੱਤਾ।
ਨਿਮਾਪਾੜਾ ਪੁਲੀਸ ਸਟੇਸ਼ਨ ਦੇ ਇੰਸਪੈਕਟਰ-ਇੰਚਾਰਜ ਬਾਮਾਦੇਵ ਸਵਾਈਨ ਨੇ ਪੀਟੀਆਈ ਨੂੰ ਫੋਨ ‘ਤੇ ਦੱਸਿਆ, ‘‘ਅਸੀਂ ਲੈਕਚਰਾਰ ਅਤੇ ਉਸ ਦੇ ਸਾਥੀ ਨੂੰ ਇੱਕ ਔਰਤ ਦੀ ਇੱਜ਼ਤ ਨੂੰ ਠੇਸ ਪਹੁੰਚਾਉਣ, ਹਮਲਾ ਕਰਨ ਅਤੇ ਉਨ੍ਹਾਂ ਨੂੰ ਸੜਕਾਂ ‘ਤੇ ਘੁੰਮਾ ਕੇ ਜਨਤਕ ਤੌਰ ‘ਤੇ ਅਪਮਾਨਿਤ ਕਰਨ ਦੇ ਦੋਸ਼ਾਂ ਹੇਠ ਗ੍ਰਿਫ਼ਤਾਰ ਕੀਤਾ ਹੈ।’’
ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੋਏ ਇੱਕ ਵੀਡੀਓ ਕਲਿੱਪ ਵਿੱਚ ਕਾਲਜ ਲੈਕਚਰਾਰ ਅਤੇ ਉਸ ਦਾ ਦੋਸਤ ਔਰਤ ਅਤੇ ਉਸ ਦੇ ਸਾਥੀ ਨਾਲ ਕੁੱਟਮਾਰ ਕਰਦੇ ਅਤੇ ਉਨ੍ਹਾਂ ਨੂੰ ਘੁੰਮਾਉਂਦੇ ਹੋਏ ਦਿਖਾਈ ਦੇ ਰਹੇ ਸਨ। ਪੁਲੀਸ ਨੇ ਦੱਸਿਆ ਕਿ ਔਰਤ ਜਿਸ ਦਾ 14 ਸਾਲ ਦਾ ਇੱਕ ਬੇਟਾ ਹੈ, ਨਿਮਾਪਾੜਾ ਕਸਬੇ ਵਿੱਚ ਇੱਕ ਕਿਰਾਏ ਦੇ ਮਕਾਨ ਵਿੱਚ ਵੱਖ ਰਹਿ ਰਹੀ ਸੀ।
