ਚੰਡੀਗਡ਼੍ਹ: ਥਾਈਲੈਂਡ ਪੁਲੀਸ ਨੇ ਗੋਆ ਨਾਈਟ ਕਲੱਬ ਦੇ ਮਾਲਕ ਲੂਥਰਾ ਭਰਾਵਾਂ- ਸੌਰਭ ਤੇ ਗੌਰਵ ਲੂਥਰਾ ਨੂੰ ਇਕ ਉਡਾਣ ਵਿਚ ਬੈਠਾ ਕੇ ਭਾਰਤ ਡਿਪੋਰਟ ਕਰ ਦਿੱਤਾ ਹੈ। ਗੋਆ ਦੇ ਇਸ ਨਾਈਟ ਕਲੱਬ ਵਿਚ ਅੱਗ ਲੱਗਣ ਕਰਕੇ 25 ਵਿਅਕਤੀਆਂ ਦੀ ਮੌਤ ਹੋ ਗਈ ਸੀ। ਇਹ ਦੋਵੇਂ ਭਰਾ ਹਾਦਸੇ ਦੇ ਕੁਝ ਘੰਟਿਆਂ ਅੰਦਰ ਦੇਸ਼ ਛੱਡ ਕੇ ਥਾਈਲੈਂਡ ਦੇ ਫੁਕੇਟ ਭੱਜ ਗਏ ਸਨ। ਹਾਦਸੇ ਮੌਕੇ ਦੋਵੇਂ ਦਿੱਲੀ ਵਿਚ ਇਕ ਵਿਆਹ ਵਿਚ ਮੌਜੂਦ ਸਨ।
ਦੋਵਾਂ ਦੇ ਭਾਰਤ ਪੁੱਜਣ ਮੌਕੇ ਕੇਂਦਰੀ ਏਜੰਸੀਆਂ ਵੱਲੋਂ ਸੌਰਭ ਲੂਥਰਾ ਤੇ ਗੌਰਵ ਲੂਥਰਾ ਨੂੰ ਦਿੱਲੀ ਦੀ ਪਟਿਆਲਾ ਹਾਊਸ ਕੋਰਟ ਲਿਜਾਇਆ ਜਾਵੇਗਾ, ਜਿੱਥੋਂ ਗੋਆ ਪੁਲੀਸ ਦੋਵਾਂ ਦਾ ਟਰਾਂਜ਼ਿਟ ਰਿਮਾਂਡ ਹਾਸਲ ਕਰੇਗੀ।
ਲੂਥਰਾ ਭਰਾਵਾਂ ਨੂੰ ਬੈਂਕਾਕ ਤੋਂ ਡਿਪੋਰਟ ਕੀਤਾ ਜਾ ਰਿਹਾ ਹੈ ਤਾਂ ਜੋ ਉਨ੍ਹਾਂ ‘ਤੇ ਬਿਨਾਂ ਕਿਸੇ ਸੁਰੱਖਿਆ ਪਰਮਿਟ ਦੇ ਕਲੱਬ ਚਲਾਉਣ ਦੇ ਦੋਸ਼ ਲਗਾਏ ਜਾ ਸਕਣ। 6 ਦਸੰਬਰ ਨੂੰ ਉਨ੍ਹਾਂ ਦੇ ਕਲੱਬ ਵਿੱਚ ਫਾਇਰ ਸ਼ੋਅ ਦੌਰਾਨ ਅੱਗ ਲੱਗੀ ਹੋਣ ਦਾ ਸ਼ੱਕ ਹੈ।
ਇਸ ਦੌਰਾਨ ਗੋਆ ਸਰਕਾਰ ਨੇ ਮਾਮਲੇ ਦੀ ਪ੍ਰਭਾਵਸ਼ਾਲੀ ਢੰਗ ਨਾਲ ਪੈਰਵੀ ਯਕੀਨੀ ਬਣਾਉਣ ਲਈ ਇੱਕ ਵਿਸ਼ੇਸ਼ ਕਾਨੂੰਨੀ ਟੀਮ ਬਣਾਈ ਹੈ। ਪੁਲੀਸ ਨੇ ਭਾਰਤੀ ਨਿਆਏ ਸੰਹਿਤਾ (BNS) ਦੀ ਧਾਰਾ 105 ਦੇ ਤਹਿਤ ਮਾਮਲਾ ਦਰਜ ਕੀਤਾ ਹੈ, ਜਿਸ ਵਿੱਚ 10 ਸਾਲ ਤੱਕ ਦੀ ਕੈਦ ਦੀ ਵਿਵਸਥਾ ਹੈ। ਜਾਂਚ ਅਧਿਕਾਰੀ ਇੱਕ ਮਜ਼ਬੂਤ ਚਾਰਜਸ਼ੀਟ ਤਿਆਰ ਕਰਨ ਲਈ ਲੂਥਰਾ ਭਰਾਵਾਂ ਵੱਲੋਂ ਕੀਤੀਆਂ ਗਈਆਂ ਸਾਰੀਆਂ ਕਥਿਤ ਉਲੰਘਣਾਵਾਂ ਦੇ ਸਬੰਧ ਵਿੱਚ ਸਬੂਤ ਇਕੱਠੇ ਕਰ ਰਹੇ ਹਨ।
ਭਾਰਤੀ ਅਧਿਕਾਰੀਆਂ ਨੇ ਥਾਈ ਅਥਾਰਿਟੀਜ਼ ਨੂੰ ਸਾਰੇ ਲੋੜੀਂਦੇ ਦਸਤਾਵੇਜ਼ ਪ੍ਰਦਾਨ ਕਰ ਦਿੱਤੇ ਹਨ, ਜਿਸ ਵਿੱਚ ਭਰਾਵਾਂ ਦੇ ਪਾਸਪੋਰਟ ਰੱਦ ਹੋਣ ਤੋਂ ਬਾਅਦ ਜਾਰੀ ਕੀਤੇ ਗਏ ਜ਼ਰੂਰੀ ਐਮਰਜੈਂਸੀ ਸਰਟੀਫਿਕੇਟ (ECs) ਵੀ ਸ਼ਾਮਲ ਹਨ।
ਭਾਰਤ ਵੱਲੋਂ ਉਨ੍ਹਾਂ ਦੇ ਪਾਸਪੋਰਟ ਮੁਅੱਤਲ ਕਰਨ ਅਤੇ ਥਾਈ ਅਧਿਕਾਰੀਆਂ ਨੂੰ ਉਨ੍ਹਾਂ ਨੂੰ ਡਿਪੋਰਟ ਕਰਨ ਦੀ ਬੇਨਤੀ ਤੋਂ ਬਾਅਦ ਥਾਈ ਪੁਲਿਸ ਨੇ ਵੀਰਵਾਰ ਨੂੰ ਫੁਕੇਟ ਦੇ ਇੱਕ ਰਿਜ਼ੋਰਟ ਤੋਂ ਭਰਾਵਾਂ ਨੂੰ ਹਿਰਾਸਤ ਵਿੱਚ ਲੈ ਲਿਆ ਸੀ। ਇੱਕ ਭਾਰਤੀ ਏਜੰਸੀ ਦੋਵਾਂ ਭਰਾਵਾਂ ਦੀ ਵਾਪਸੀ ਲਈ ਰਸਮੀ ਕਾਰਵਾਈਆਂ ਵਾਸਤੇ ਤਾਲਮੇਲ ਵੀ ਕਰ ਰਹੀ ਹੈ।
