ਨਵੀਂ ਦਿੱਲੀ: ਸੰਗਠਿਤ ਸਾਈਬਰ ਅਤੇ ਟੈਲੀਕਾਮ ਨਾਲ ਸਬੰਧਤ ਧੋਖਾਧੜੀ ਵਿਰੁੱਧ ਇੱਕ ਵੱਡੀ ਕਾਰਵਾਈ ਕਰਦਿਆਂ ਦਿੱਲੀ ਪੁਲੀਸ ਦੇ ਸਪੈਸ਼ਲ ਸਟਾਫ਼ (ਸੈਂਟਰਲ ਡਿਸਟ੍ਰਿਕਟ) ਨੇ ਕਰੋਲ ਬਾਗ ਇਲਾਕੇ ਵਿੱਚ ਨਕਲੀ ਪ੍ਰੀਮੀਅਮ ਸੈਮਸੰਗ ਮੋਬਾਈਲ ਫੋਨਾਂ ਨੂੰ ਗੈਰ-ਕਾਨੂੰਨੀ ਤਰੀਕੇ ਨਾਲ ਅਸੈਂਬਲ ਕਰਨ ਅਤੇ ਵੇਚਣ ਵਾਲੇ ਇੱਕ ਵੱਡੇ ਰੈਕੇਟ ਦਾ ਪਰਦਾਫਾਸ਼ ਕੀਤਾ ਹੈ। ਪੁਲੀਸ ਅਨੁਸਾਰ ਇਹ ਗਿਰੋਹ ਚੀਨ ਤੋਂ ਮੰਗਵਾਏ ਗਏ ਪੁਰਜ਼ਿਆਂ ਦੀ ਵਰਤੋਂ ਕਰਕੇ ਸੈਮਸੰਗ ਦੇ ਮਹਿੰਗੇ ਮਾਡਲ ਜਿਵੇਂ ਕਿ Ultra, Fold ਅਤੇ Flip ਤਿਆਰ ਕਰਦਾ ਸੀ। ਇਨ੍ਹਾਂ ਫੋਨਾਂ ‘ਤੇ ਨਕਲੀ IMEI ਨੰਬਰ ਚਿਪਕਾਏ ਜਾਂਦੇ ਸਨ ਅਤੇ ਫਿਰ ਇਨ੍ਹਾਂ ਨੂੰ ਖੁੱਲ੍ਹੇ ਬਾਜ਼ਾਰ ਵਿੱਚ ਅਸਲੀ ਬ੍ਰਾਂਡਿਡ ਫੋਨ ਦੱਸ ਕੇ ਭੋਲੇ-ਭਾਲੇ ਗਾਹਕਾਂ ਨੂੰ ਵੇਚ ਦਿੱਤਾ ਜਾਂਦਾ ਸੀ। ਖਾਸ ਸੂਚਨਾ ਦੇ ਆਧਾਰ ’ਤੇ ਪੁਲੀਸ ਨੇ ਕਰੋਲ ਬਾਗ ਦੇ ਬੀਡਨਪੁਰਾ ਸਥਿਤ ਇੱਕ ਦੁਕਾਨ ‘ਤੇ ਰਾਤ ਨੂੰ ਛਾਪਾ ਮਾਰਿਆ। ਪੁਲੀਸ ਨੇ ਮੌਕੇ ਤੋਂ ਚਾਰ ਮੁਲਜ਼ਮਾਂ ਨੂੰ ਫੋਨ ਅਸੈਂਬਲ ਕਰਦੇ ਹੋਏ ਰੰਗੇ ਹੱਥੀਂ ਕਾਬੂ ਕੀਤਾ।
ਪ੍ਰੀਮੀਅਮ ਫੋਨਾਂ ਅਤੇ IMEI ਸਟਿੱਕਰਾਂ ਦੀ ਬਰਾਮਦਗੀ:
512 ਹਾਈ-ਐਂਡ ਸੈਮਸੰਗ ਪ੍ਰੀਮੀਅਮ ਫੋਨ (ਖ਼ਾਸ ਕਰਕੇ Fold ਅਤੇ Flip ਮਾਡਲ)।
124 ਮਦਰਬੋਰਡ ਅਤੇ 138 ਮੋਬਾਈਲ ਬੈਟਰੀਆਂ।
459 ਨਕਲੀ IMEI ਸਟਿੱਕਰ (ਜਿਨ੍ਹਾਂ ‘ਤੇ “Made in Vietnam” ਲਿਖਿਆ ਹੋਇਆ ਸੀ)।
ਭਾਰੀ ਮਾਤਰਾ ਵਿੱਚ ਮੋਬਾਈਲ ਐਕਸੈਸਰੀਜ਼ ਅਤੇ ਅਸੈਂਬਲਿੰਗ ਟੂਲ।
ਮਾਸਟਰਮਾਈਂਡ ਸਿਰਫ਼ 8ਵੀਂ ਪਾਸ
ਪੁੱਛਗਿੱਛ ਦੌਰਾਨ ਸਾਹਮਣੇ ਆਇਆ ਕਿ ਇਸ ਪੂਰੇ ਰੈਕੇਟ ਦਾ ਮਾਸਟਰਮਾਈਂਡ ਸਿਰਫ਼ 8ਵੀਂ ਜਮਾਤ ਪਾਸ ਹੈ ਅਤੇ ਉਸ ਕੋਲ ਕੋਈ ਤਕਨੀਕੀ ਡਿਗਰੀ ਨਹੀਂ ਹੈ। ਉਹ ਚੀਨ ਤੋਂ ਸਪੇਅਰ ਪਾਰਟਸ ਮੰਗਵਾ ਕੇ ਆਪਣੇ ਕਰਮਚਾਰੀਆਂ ਦੀ ਮਦਦ ਨਾਲ ਇਹ ਫੋਨ ਤਿਆਰ ਕਰਵਾਉਂਦਾ ਸੀ। ਇਹ ਨਕਲੀ ਫੋਨ ਬਾਜ਼ਾਰ ਵਿੱਚ 35,000 ਤੋਂ 40,000 ਰੁਪਏ ਪ੍ਰਤੀ ਯੂਨਿਟ ਵੇਚੇ ਜਾਂਦੇ ਸਨ, ਜਿਸ ਨਾਲ ਮੁਲਜ਼ਮ ਮੋਟਾ ਨਜਾਇਜ਼ ਮੁਨਾਫ਼ਾ ਕਮਾ ਰਹੇ ਸਨ।
ਪੁਲੀਸ ਨੇ ਚਾਰਾਂ ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ ਅਤੇ ਉਨ੍ਹਾਂ ਖ਼ਿਲਾਫ਼ ਕਰੋਲ ਬਾਗ ਥਾਣੇ ਵਿੱਚ ਟੈਲੀਕਮਿਊਨੀਕੇਸ਼ਨ ਐਕਟ ਅਤੇ ਭਾਰਤੀ ਨਿਆ ਸੰਹਿਤਾ (BNS) ਦੀਆਂ ਵੱਖ-ਵੱਖ ਧਾਰਾਵਾਂ ਤਹਿਤ ਕੇਸ ਦਰਜ ਕੀਤਾ ਗਿਆ ਹੈ। ਪੁਲੀਸ ਹੁਣ ਇਸ ਗੱਲ ਦੀ ਜਾਂਚ ਕਰ ਰਹੀ ਹੈ ਕਿ ਇਨ੍ਹਾਂ ਫੋਨਾਂ ਦੀ ਸਪਲਾਈ ਕਿੱਥੇ-ਕਿੱਥੇ ਕੀਤੀ ਜਾਂਦੀ ਸੀ ਅਤੇ ਇਸ ਵਿੱਚ ਹੋਰ ਕੌਣ-ਕੌਣ ਸ਼ਾਮਲ ਹੈ।
