ਸਿਓਲ : ਉੱਤਰੀ ਕੋਰੀਆ ਦੇ ਨੇਤਾ ਕਿਮ ਯੋਂਗ ਉਨ ਦੀ ਭੈਣ ਕਿਮ ਯੋ ਜੋਂਗ ਨੇ ਪਰਮਾਣੂ ਨਿਸ਼ਸਤਰੀਕਰਨ ’ਤੇ ਕੂਟਨੀਤੀ ਬਹਾਲ ਕਰਨ ’ਚ ਅਮਰੀਕੀ ਇਰਾਦਿਆਂ ਨੂੰ ਖਾਰਜ ਕੀਤਾ ਤੇ ਵਾਸ਼ਿੰਗਟਨ ਨੂੰ ਅਪੀਲ ਕੀਤੀ ਕਿ ਉਹ ਉਨ੍ਹਾਂ ਦੇ ਮੁਲਕ ਨੂੰ ਪਰਮਾਣੂ ਹਥਿਆਰ ਸਮਰੱਥ ਦੇਸ਼ ਵਜੋਂ ਸਵੀਕਾਰ ਕਰੇ ਤੇ ਗੱਲਬਾਤ ਮੁੜ ਸ਼ੁਰੂ ਕਰਨ ਲਈ ਨਵਾਂ ਨਜ਼ਰੀਆ ਅਪਣਾਵੇ। ਉਨ੍ਹਾਂ ਇਹ ਵੀ ਆਖਿਆ ਕਿ ਉਨ੍ਹਾਂ ਦੇ ਭਰਾ ਤੇ ਟਰੰਪ ਵਿਚਾਲੇ ਸਬੰਧ ‘ਖਰਾਬ ਨਹੀਂ’ ਹਨ।
ਕਿਮ ਯੋ ਯੋਂਗ ਦੇ ਬਿਆਨ ਤੋਂ ਸੰਕੇਤ ਮਿਲਦਾ ਹੈ ਕਿ ਉੱਤਰੀ ਕੋਰੀਆ ਗੱਲਬਾਤ ਲਈ ਉਦੋਂ ਹੀ ਰਾਜ਼ੀ ਹੋਵੇਗਾ ਜਦੋਂ ਅਮਰੀਕਾ ਉਸ ਨੂੰ ਆਪਣੀ ਪਰਮਾਣੂ ਸਮਰੱਥਾ ਦੇ ਅੰਸ਼ਕ ਤੌਰ ’ਤੇ ਤਿਆਗਣ ਬਦਲੇ ਰਾਹਤ ਦੇਵੇਗਾ। ਕੁਝ ਮਾਹਿਰਾਂ ਦੇ ਕਹਿਣਾ ਹੈ ਕਿ ਅਮਰੀਕੀ ਰਾਸ਼ਟਰਪਤੀ ਡੋਨਲਡ ਟਰੰਪ ਕੂਟਨੀਤਕ ਪ੍ਰਾਪਤੀ ਲਈ ਉੱਤਰ ਕੋਰੀਆ ਨਾਲ ਗੱਲਬਾਤ ਦੀ ਕੋਸ਼ਿਸ਼ ਕਰ ਸਕਦੇ ਹਨ। ਕਿਮ ਜੋਂਗ ਉਨ ਨੇ ਆਪਣੇ ਮੁੱਖ ਪਰਮਾਣੂ ਕੰਪਲੈਕਸ ਨਸ਼ਟ ਕਰਨ ਲਈ ਪਾਬੰਦੀਆਂ ’ਚ ਵੱਡੇ ਪੱਧਰ ’ਤੇ ਰਾਹਤ ਮੰਗੀ ਸੀ। ਕਿਮ ਦੀ ਭੈਣ ਨੇ ਕਿਹਾ ਕਿ ਉਨ੍ਹਾਂ ਦੇ ਭਰਾ ਤੇ ਟਰੰਪ ਵਿਚਾਲੇ ਸਬੰਧ ‘ਖਰਾਬ ਨਹੀਂ’ ਹਨ। ਸਰਕਾਰੀ ਮੀਡੀਆ ਵੱਲੋਂ ਜਾਰੀ ਬਿਆਨ ’ਚ ਕਿਮ ਯੋ ਜੋਂਗ ਨੇ ਕਿਹਾ ਕਿ ਉਹ ਇਸ ਗੱਲ ਤੋਂ ਇਨਕਾਰ ਨਹੀਂ ਕਰਦੀ ਕਿ ਉਨ੍ਹਾਂ ਦੇ ਭਰਾ ਤੇ ਟਰੰਪ ਵਿਚਾਲੇ ਸਬੰਧ ‘‘ਖਰਾਬ ਨਹੀਂ ਹਨ।’’ ਹਾਲਾਂਕਿ ਉਨ੍ਹਾਂ ਕਿਹਾ ਕਿ ਜੇਕਰ ਉਨ੍ਹਾਂ ਦੇ ਭਰਾ ਤੇ ਟਰੰਪ ਵਿਚਾਲੇ ਵਿਅਕਤੀਗਤ ਸਬੰਧਾਂ ਤੋਂ ਉੱਤਰੀ ਕੋਰੀਆ ਦੇ ਪਰਮਾਣੂ ਨਿਸ਼ਸਤਰੀਕਰਨ ਦਾ ਉਦੇਸ਼ ਪੂਰਾ ਹੋਣ ਦੀ ਉਮੀਦ ਕੀਤੀ ਜਾ ਰਹੀ ਹੈ ਤਾਂ ਉੱਤਰੀ ਕੋਰੀਆ ਦੀਆਂ ਨਜ਼ਰਾਂ ’ਚ ਇਹ ਸਿਰਫ ‘ਮਜ਼ਾਕ ਤੋਂ ਇਲਾਵਾ ਕੁਝ ਨਹੀਂ ਹੈ।’’
