ਸ਼ਿਖਰ ਧਵਨ ਯਾਨੀ ‘ਗੱਬਰ’ ਮਸ਼ਹੂਰ ਸਪੋਰਟਸ ਸੈਲੀਬ੍ਰਿਟੀਜ਼ ‘ਚੋਂ ਇਕ ਹੈ। IPL 2022 ‘ਚ ਇਨ੍ਹੀਂ ਦਿਨੀਂ ਉਹ ਪੰਜਾਬ ਕਿੰਗਜ਼ ਦੀ ਟੀਮ ਲਈ ਖੇਡਦੇ ਨਜ਼ਰ ਆ ਰਹੇ ਹਨ। ਕ੍ਰਿਕਟ ਪਿੱਚ ‘ਤੇ ਆਪਣਾ ਜਲਵਾ ਦਿਖਾਉਣ ਤੋਂ ਬਾਅਦ ਹੁਣ ਸ਼ਿਖਰ ਧਵਨ ਕੈਮਰੇ ਦੇ ਸਾਹਮਣੇ ਆਪਣਾ ਜੌਹਰ ਦਿਖਾਉਣ ਜਾ ਰਹੇ ਹਨ। ਜੇਕਰ ਤੁਸੀਂ ਸ਼ਿਖਰ ਦੇ ਹਰ ਸਟਾਈਲ ਦੇ ਫੈਨ ਹੋ ਤਾਂ ਇਹ ਖਬਰ ਤੁਹਾਡੇ ਲਈ ਹੈ। ਭਾਰਤੀ ਟੀਮ ਦਾ ‘ਗੱਬਰ’ ਹੁਣ ਬਾਲੀਵੁੱਡ ‘ਚ ਨਜ਼ਰ ਆਉਣ ਵਾਲਾ ਹੈ। ਸ਼ਿਖਰ ਧਵਨ ਦੇ ਹੱਥ ‘ਚ ਇਕ ਦਮਦਾਰ ਫਿਲਮ ਆ ਗਈ ਹੈ, ਜਿਸ ‘ਚ ਉਹ ਹੁਣ ਜੌਹਰ ਦਿਖਾਉਂਦੇ ਨਜ਼ਰ ਆਉਣਗੇ।ਸ਼ਿਖਰ ਧਵਨ ਹੁਣ ਬਾਲੀਵੁਡ ਵਿੱਚ ਆਪਣੇ ਡੈਬਿਊ ਦੇ ਨਾਲ ਹੀ ਇੱਕ ਖੇਡ ਮੈਦਾਨ ਦੀ ਪਿਚ ਨਾਲ ਫਿਲਮ ਵਿੱਚ ਆਪਣਾ ਜਲਵਾ ਦਿਖਾਉਂਦੇ ਨਜ਼ਰ ਆਉਣਗੇ ਅਤੇ ਉਨ੍ਹਾਂ ਨੇ ਇਸ ਦੇ ਲਈ ਤਿਆਰੀ ਵੀ ਕਰ ਲਈ ਹੈ। ਪਿੰਕਵਿਲਾ ਦੀ ਰਿਪੋਰਟ ਮੁਤਾਬਕ ‘ਗੱਬਰ’ ਨੇ ਕੁਝ ਸਮਾਂ ਪਹਿਲਾਂ ਹੀ ਫਿਲਮ ਦੀ ਸ਼ੂਟਿੰਗ ਪੂਰੀ ਕੀਤੀ ਹੈ। ਹਾਲਾਂਕਿ ਫਿਲਮ ਦਾ ਟਾਈਟਲ ਅਜੇ ਸਾਹਮਣੇ ਨਹੀਂ ਆਇਆ ਹੈ।ਰਿਪੋਰਟ ‘ਚ ਇਕ ਸੂਤਰ ਦੇ ਹਵਾਲੇ ਨਾਲ ਕਿਹਾ ਗਿਆ ਹੈ ਕਿ ਸ਼ਿਖਰ ਧਵਨ ‘ਚ ਫਿਲਮੀ ਸਿਤਾਰਿਆਂ ਦਾ ਕਾਫੀ ਸਨਮਾਨ ਹੈ ਅਤੇ ਜਦੋਂ ਉਨ੍ਹਾਂ ਨੂੰ ਇਸ ਫਿਲਮ ਦਾ ਹਿੱਸਾ ਆਫਰ ਕੀਤਾ ਗਿਆ ਤਾਂ ਉਹ ਇਸ ਨੂੰ ਲੈ ਕੇ ਕਾਫੀ ਖੁਸ਼ ਸਨ। ਮੇਕਰਸ ਨੂੰ ਲੱਗਾ ਕਿ ਸ਼ਿਖਰ ਫਿਲਮ ਦੇ ਉਸ ਹਿੱਸੇ ਲਈ ਪਰਫੈਕਟ ਸਨ। ਅਜਿਹੇ ‘ਚ ਮੇਕਰਸ ਨੇ ਸ਼ਿਖਰ ਧਵਨ ਨਾਲ ਸੰਪਰਕ ਕੀਤਾ ਤਾਂ ਉਹ ਉਨ੍ਹਾਂ ਨੂੰ ਇਨਕਾਰ ਨਹੀਂ ਕਰ ਸਕੇ। ਸ਼ਿਖਰ ਧਵਨ ਨੂੰ ਇਹ ਰੋਲ ਪਿਛਲੇ ਮਹੀਨੇ ਹੀ ਆਫਰ ਕੀਤਾ ਗਿਆ ਸੀ। ਇਹ ਕੋਈ ਕੈਮਿਓ ਰੋਲ ਨਹੀਂ ਹੈ। ਇਸ ਫਿਲਮ ‘ਚ ਸ਼ਿਖਰ ਧਵਨ ਅਹਿਮ ਭੂਮਿਕਾ ਨਿਭਾਉਣ ਜਾ ਰਹੇ ਹਨ ਅਤੇ ਫਿਲਮ ਦੇ ਇਸ ਸਾਲ ਰਿਲੀਜ਼ ਹੋਣ ਦੀ ਉਮੀਦ ਹੈ।
‘ਗੱਬਰ’ ਦੇ ਚੰਗੇ ਦੋਸਤ ਹਨ ਅਕਸ਼ੈ ਕੁਮਾਰ-ਰਣਵੀਰ ਸਿੰਘ
ਪਿਛਲੇ ਸਾਲ ਅਕਤੂਬਰ ‘ਚ ਸ਼ਿਖਰ ਨੂੰ ਅਕਸ਼ੇ ਕੁਮਾਰ ਦੀ ਫਿਲਮ ‘ਰਾਮ ਸੇਤੂ’ ਦੇ ਸੈੱਟ ‘ਤੇ ਦੇਖਿਆ ਗਿਆ ਸੀ। ਇਸ ਤੋਂ ਬਾਅਦ ਅਫਵਾਹਾਂ ਉੱਠੀਆਂ ਕਿ ਕ੍ਰਿਕਟਰ ਫਿਲਮ ਦਾ ਹਿੱਸਾ ਹਨ। ਹਾਲਾਂਕਿ ਸ਼ਿਖਰ ‘ਰਾਮ ਸੇਤੂ’ ਨਾਲ ਆਪਣਾ ਡੈਬਿਊ ਨਹੀਂ ਕਰ ਰਹੇ ਹਨ। ਦਿਲਚਸਪ ਗੱਲ ਇਹ ਹੈ ਕਿ ਉਹ ਅਤੇ ਅਕਸ਼ੈ ਕਰੀਬੀ ਦੋਸਤ ਹਨ, ਜਿਸ ਕਾਰਨ ਸ਼ਿਖਰ ਉਨ੍ਹਾਂ ਨੂੰ ਸੈੱਟ ‘ਤੇ ਮਿਲਣ ਹੀ ਆਏ ਸਨ। ਸ਼ਿਖਰ ਅਤੇ ਰਣਵੀਰ ਸਿੰਘ ਵੀ ਚੰਗੇ ਦੋਸਤ ਹਨ। ਪਿਛਲੇ ਸਾਲ ਉਨ੍ਹਾਂ ਨੇ ਅਦਾਕਾਰ ਨਾਲ ਇੱਕ ਤਸਵੀਰ ਸਾਂਝੀ ਕੀਤੀ ਸੀ ਅਤੇ ਉਨ੍ਹਾਂ ਨੂੰ ਫਿਲਮ 83 ਦੀ ਸਫਲਤਾ ਲਈ ਵਧਾਈ ਦਿੱਤੀ ਸੀ।
