ਇਟਲੀ ‘ਚ Amazon ਉਤੇ ਵੱਡੀ ਕਾਰਵਾਈ ਕੀਤੀ ਗਈ ਹੈ। ਇਟਲੀ ਦੀ ਐਂਟੀਟ੍ਰਸਟ ਅਥਾਰਟੀ (Italy’s antitrust authority) ਨੇ ਵੀਰਵਾਰ ਨੂੰ ਕਿਹਾ ਕਿ ਐਮਾਜ਼ਾਨ ‘ਤੇ 1.3 ਬਿਲੀਅਨ ਡਾਲਰ ਦਾ ਜੁਰਮਾਨਾ ਲਗਾਇਆ ਗਿਆ ਹੈ। ਇਹ ਰਕਮ ਭਾਰਤੀ ਕਰੰਸੀ ਵਿੱਚ 9.6 ਹਜ਼ਾਰ ਕਰੋੜ ਰੁਪਏ ਤੋਂ ਵੱਧ ਹੈ। ਇਹ ਕਾਰਵਾਈ ਅਮਰੀਕਾ ਦੀ ਵੱਡੀ ਤਕਨੀਕੀ ਕੰਪਨੀ ਐਮਾਜ਼ਾਨ ‘ਤੇ ਯੂਰਪ ‘ਚ ਆਪਣੇ ਬਾਜ਼ਾਰ ਦਬਦਬੇ ਦੀ ਦੁਰਵਰਤੋਂ ਕਰਨ ਦਾ ਦੋਸ਼ ਲਗਾਉਂਦੇ ਹੋਏ ਕੀਤੀ ਗਈ ਹੈ।
ਦਿ ਕੰਪੀਟੀਸ਼ਨ ਵਾਚਡੌਗ (The competition watchdog) ਵੱਲੋਂ ਜਾਰੀ ਬਿਆਨ ਵਿੱਚ ਕਿਹਾ ਗਿਆ ਹੈ ਕਿ ਐਮਾਜ਼ਾਨ ਨੇ ਇਟਾਲੀਅਨ ਬਾਜ਼ਾਰ ਵਿੱਚ ਆਪਣੇ ਦਬਦਬੇ ਦੀ ਵਰਤੋਂ (Dominant position) ਆਪਣੀ ਲੌਜਿਸਟਿਕ ਸੇਵਾਵਾਂ ਦੇ ਪੱਖ ਵਿੱਚ ਕਰਨ ਲਈ ਕੀਤੀ। ਇਸ ਕਾਰਨ, ਕੰਪਨੀ ਨੇ ਆਪਣਾ ਦਬਦਬਾ ਹੋਰ ਮਜ਼ਬੂਤ ਕੀਤਾ ਅਤੇ ਈ-ਕਾਮਰਸ ਸੈਕਟਰ ਵਿੱਚ ਆਪਣੇ ਮੁਕਾਬਲੇਬਾਜ਼ਾਂ ਨੂੰ ਨੁਕਸਾਨ ਪਹੁੰਚਾਇਆ।
ਕਾਬਲੇਗੌਰ ਹੈ ਕਿ ਦੋ ਹਫ਼ਤੇ ਪਹਿਲਾਂ ਵੀ ਐਮਾਜ਼ਾਨ ਨੂੰ ਯੂਰਪੀਅਨ ਕਾਨੂੰਨਾਂ ਦੀ ਉਲੰਘਣਾ ਕਰਨ ਲਈ 68.7 ਮਿਲੀਅਨ ਯੂਰੋ ਦਾ ਜੁਰਮਾਨਾ ਲਗਾਇਆ ਗਿਆ ਸੀ। ਇਸ ਅਥਾਰਟੀ ਵੱਲੋਂ ਇਹ ਜੁਰਮਾਨਾ ਵੀ ਲਗਾਇਆ ਗਿਆ ਸੀ। ਇਹ ਜੁਰਮਾਨਾ ਐਪਲ (Apple) ਅਤੇ ਬੀਟਸ (Beats) ਦੇ ਉਤਪਾਦਾਂ ਦੀ ਵਿਕਰੀ ਵਿੱਚ ਮੁਕਾਬਲੇ ਵਿਰੋਧੀ ਸਹਿਯੋਗ ਕਾਰਨ ਲਗਾਇਆ ਗਿਆ ਹੈ। ਬੀਟਸ ਆਡੀਓ ਉਤਪਾਦ ਤਿਆਰ ਕਰਦੀ ਹੈ।
